Озгъан ыйыкъда  Нальчикде  Мечиланы Кязим атлы сабий эм жаш тёлю китапханада «Устазлагъа бизни ыспас сёзлерибиз!» деген республикалы конкурсну ахыр кесеги ётгенди. Эсигизге салайыкъ, бу эришиу  Устазны бла насийхатчыны жылына жораланып бардырылгъан жумуш болгъанды.  Анга школладан бла сабий садладан 50-ге жууукъ къызчыкъ бла жашчыкъ сюйюп къатышхандыла. Аланы назму айтыуларына багъа берирге жыйылгъан жюриге уа белгили поэтле бла жамауат къуллукъчула киргендиле. 

Библиотеканы ишчилери келген къонакълагъа жарыкъ сёзле бла тюбеп, эришиуде жетишимли болурларын сюйгенлерин билдиргендиле.  Биринчиле болуб а сахнагъа сабий садланы келечилери чыкъырылгъан эдиле. Къашхатаучу жашчыкъ Улбашланы Мунир эм нальчикчи къызчыкъ Кереметланы Милана назмуларын айтхандан сора, жыйылгъанла аланы къызыу къарсла бла ашыргъандыла. Ала юйретиучюлерини къыйынларын белгилеп, алагъа ыспас сёзледен толу тизгинлени айтхандыла. 
Устазларына сюймекликлерин ачыкълагъанланы араларында уа Хасаниядан Бёзюланы Зухура, Тырныаууздан Хаджиланы Ибрагим,Терк райондан Шахмырзаланы Алёна, Нальчикден Бауаланы Амин да бар эдиле. Ала назмуланы ана тиллеринде эм орусча да хазырлагъандыла. Сёз ючюн, эришиуге Тырныауузну 5-чи номерли гимназиясыны келечиси Хаджиланы Ибрагим устазы Биттирланы Асият бла Огъары Басханны орта школунда кёп жылланы ишлеп тургъан Ёзденланы Хызирни «Устазыма» деген чыгъармасын хазырлагъан эдиле. Жашчыкъ аны малкъар тилде шатык эм эсде къалырча окъугъанды. Нальчикни «Радуга» деген школгъа дери билим бериу учреждениясыны келечиси Бауаланы Амин а  Занкишиланы Жагъаны «Устазым» деген назмусун окъугъанды.  Аны ана тилден бла адабиятдан устазы Жанатайланы Фатима белгилегеннге кёре, быллай эришиуле бек магъаналыдыла. Ала сабийлерибизде ёз тилибизге сюймекликни ёсдюредиле эм устазны сыйы не заманда да бийик болгъанын ангыларгъа болушадыла. 
Конкурсха багъа бичгенледен бири белгили поэт Болатланы Юруслан эди. Сёз берилгенде ол бу тематикагъа назмула алай кёп жазылмагъанларын уллу жарсыу бла чертгенди. 
- Мени оюмума кёре, сабий айтырыкъ назмуну сайлаугъа жууаплы кёзден къараргъа керекди устазлагъа. Нек дегенде алай бла аны чынтты поэзия къаллай болгъанына тюшюнюр онгу болады, – деп чертгенди ол. 
Сабийле алай бла устазларына бла юйретиучюлерине жюрекден келген сюймекликлерин ачыкълагъанлары бек къууандыргъанды. 
 
Таппасханланы Аминат.
Суратны Холаланы
 Марзият алгъанды.