НыбжьыщIэхэм я республикэ библиотекэ Мечиев Кязым и цIэр зезыхьэм щекIуэкIащ усэ къеджэнымкIэ «Сегодня славим мы учителей» зэпеуэр. Ар къызэрагъэпэщащ КъБР-м ЩэнхабзэмкIэ и министерствэм и нэIэм щIэту, егъэджакIуэхэмрэ гъэсакIуэхэмрэ я илъэсым и щIыхькIэ.
 Я ныбжькIэ зэхуэмыдэу еджакIуэ 45-р мы зэхьэзэхуэм я зэфIэкI щеплъыжащ. Ахэр къеджащ Къэбэрдей-Балъкъэрым и иджырей усакIуэ пажэхэм, лъэпкъ литературэхэм я классикхэм адыгэбзэкIэ, балъкъэрыбзэкIэ, урысыбзэкIэ ятха усэхэм.
- Дэтхэнэ зы цIыхум и дежкIи егъэджакIуэр щыIащ, щыIэщ икIи щыIэнущ. А IэщIагъэр зэи мыкIуэдыжыну дыщогугъ. А лэжьыгъэ мытыншым пэрытхэрщ ди зэпеуэр зытедухуар, - жиIащ НыбжьыщIэхэм я библиотекэм и унафэщIым и къуэдзэ Мечиевэ Ларисэ. – ЕгъэджакIуэ нэсым Iэмал имыIэу лъэужь къыщигъэнэнущ еджакIуэм и гумрэ и гупсысэхэмрэ.
Зэхьэзэхуэм и къэпщытакIуэ гупым хэтащ усакIуэ, зэдзэкIакIуэ Болэт Юруслан, КъБР-м Тхылъыр фIыуэ зылъагъухэм я зэгухьэныгъэм и гъэзэщIакIуэ советым и унафэщI Шинкарёвэ Наталье, КъБР-м и цIыхубэ сурэтыщI Жылэ Анатолэ, журналистхэу Бэрбэч Борисрэ Щэрдан Юлианэрэ. Зэпеуэм кърикIуахэр зэхалъхьэжащ. Абы щытекIуахэр щагъэлъэпIэнущ Сабий тхылъым и тхьэмахуэм ирихьэлIэу къызэрагъэпэщыну гуфIэгъуэ зэхыхьэм. ЕгъэджакIуэ нэхъыфIхэри абы щагъэпэжэнущ.

Тхыгъэри сурэтхэри ТЕКIУЖЬ Заретэ ейщ.