УФ-м и Президент Путин Владимир и унафэкIэ ягъэнэхуа ЕгъэджакIуэмрэ унэтIакIуэмрэ я илъэсыр иджыблагъэ Къэбэрдей-Балъкъэрым щрагъэжьащ. Абы епхауэ ирагъэкIуэкIыну Iуэхугъуэхэм я махуэщI пежьэр Налшык къалэ дэт курыт еджапIэ №33-м щызэхэтащ.
ЗэIущIэм хэтащ КъБР-м и Правительствэм и УнафэщI Мусуков Алий, КъБР-м и Парламентым и УнафэщI Егоровэ Татьянэ, КъБР-м и Iэтащхьэм и Администрацэм и УнафэщI Къуэдзокъуэ Мухьэмэд, КъБР-м егъэджэныгъэмрэ щIэныгъэмкIэ и министер Езауэ Анзор, КъБР-м Егъэджэныгъэмрэ щIэныгъэмкIэ и министерствэм и Жылагъуэ советым и унафэщI Сэхъурокъуэ Хьэутий, КъБР-м и Правительствэм щыщхэр, егъэджэныгъэ IэнатIэм и ветеранхэр, егъэджакIуэхэр, гъэсакIуэхэр, унэтIакIуэхэр, жылагъуэ лэжьакIуэхэр.
КъБР-м и Iэтащхьэ КуэкIуэ Казбек егъэджакIуэхэмрэ унэтIакIуэхэмрэ зэрызахуигъазэ псалъэм Къуэдзокъуэ Мухьэмэд зэхуэсым кърихьэлIахэм къахуеджащ. Дызытехьэ 2023 гъэр егъэджакIуэхэм хэхауэ я илъэсщ. ЕгъэджакIуэ цIэрыIуэ, лъэпкъ щэнгъасэм и щIэныгъэ лъабжьэр зыгъэтIылъа Ушинский Константин къызэралъхурэ илъэс 200 щрикъум ирихьэлIэу къэралым мыхьэнэшхуэ зрит Iуэхугъуэхэр егъэджэныгъэ IэнатIэм щекIуэкIынущ. Жылагъуэм и щыIэныгъэр куэдкIэ зэлъыта IэщIагъэм, ЕгъэджакIуэ нэсым, УнэтIакIуэ пэжым я илъэсщ дызытехьэ гъэри, фIы къытхудэкIуэну, дефIэкIуэну си гуапэщ», – щыжиIащ КъБР-м и Iэтащхьэм и фIэхъус псалъэм.
КъБР-м и Правительствэм и УнафэщI Мусуков Алий къызэрыхигъэщамкIэ, ЕгъэджакIуэмрэ унэтIакIуэмрэ я илъэсым ирихьэлIэу Къэбэрдей-Балъкъэрым Iуэхугъуэ зэмылIэужьыгъуэ куэд щекIуэкIынущ, дэтхэнэри еджэныгъэ IэнатIэм зиужьыным икIи ефIэкIуэным хуэунэтIауэ. «ЕгъэджакIуэм и мыхьэнэр къыпхуэмылъытэну инщ. ДызыхэпсэукI дунейр апхуэдизкIэ цIыкIу хъуащи, жылэхэм я зэхыхьэ-зэхэкIыр апхуэдизкIэ щIэхуэбжьащи, щытыкIэм хуэфэщэн щIэныгъэ уимыIэнкIэ Iэмал иIэкъым. ЕгъэджакIуэмрэ унэтIакIуэмрэ я илъэсыр зыхуэгъэзар а IэщIагъэр къыхэзыхахэм я зэфIэкIым хэгъэхъуэн къудейм и закъуэкъым, ар хуэунэтIащ еджапIэмрэ абы щылажьэхэмрэ я пщIэр къэIэтыным, нэхъапэкIэ щIэныгъэр зи IэнатIэм иIа Iулыджыр къэгъэщIэрэщIэжыным. ЩIэблэр зыгъасэ, фIым хуэзыущий, зытет дунейм къыщыхуэщхьэпэн щIэныгъэ къезытым хуэмыфащэ дахэ зыри щыIэкъым. ЕгъэджакIуэмрэ унэтIакIуэмрэ ди щIыналъэм и къэкIуэнур яубзыху, и пщэдейм хуогъэтIылъэ. Абыхэм я гъэсэнхэм я зэхэщIыкIымрэ дуней лъагъукIэмрэ елъытащ ди щыIэныгъэр зыхуэдэнур, ди псэукIэр зэрыщытынур. Дызэрыт илъэсыр IэнатIэрылажьэхэм я зэхьэзэхуэрэ зэпеуэкIэ гъэнщIауэ щытынущ. Псори зэгъусэу КъБР-м Егъэджэныгъэмрэ щIэныгъэмкIэ и министерствэм пэхуэщIэ (проект) 55-рэ игъэхьэзыращ, дэтхэнэми ди егъэджакIуэхэм я зэфIэкIыр щагъэлъэгъуэну Iэмал яIэу. ДызэрыщыгугъымкIэ, псори зэгъусэу а Iуэхугъуэ купщIафIэхэм цIыху мин 20-м щIигъу хэтынущ. Сыхуейщ илъэсыр хэт и дежкIэ нэхуу къыщIэкIыну, ди гуращэхэмрэ гугъапIэхэмрэ зэтехуэу, ди хъуэпсапIэхэр къыдэхъулIэу екIуэкIыну», – жиIащ Мусуков Алий.
АдэкIэ псалъэр зрата, КъБР-м и Парламентым и УнафэщI Егоровэ Татьянэ егъэджакIуэм сыт хуэдэ лъэхъэни фIэлIыкI иIэу, и псалъэм цIыхухэр щIэдэIуэу, абы и деж чэнджэщакIуэ кIуэуэ зэрыщытар жиIащ. «ЕгъэджакIуэр цIыху къызэрыгуэкIкъым. Абы щIэныгъэшхуэ къуэлъщ, сыт хуэдэ упщIэми и жэуап иIэщ. ЕгъэджакIуэр сабийм дежкIэ жьауэшхуэщ. Абы зэриузэщIым хуэдэу, дунейм и гъуэгубэм зэрытришэм хуэдэу тезышэн зыри щыIэкъым. Адэ-анэр гъуазэмэ, егъэджакIуэр унэтIакIуэщ. ЩIэблэм IэщIагъэ яхуэхъунур къамыщтэ щIыкIэ лъагъуныгъэ хурагъэщIу, я гур хуагъэушэу, екIумрэ емыкIумрэ зищIысыр ирагъащIэу ящхьэщытщ ахэр абыхэм. ГукIи псэкIи сощIэ, зымащIэкIи шэч къытесхьэркъым пщIэ зыпылъ мы IэщIагъэ дахэм и илъэсыр акъылрэ щIэныгъэкIэ гъэнщIауэ зэрекIуэкIынур, IэнатIэм пэрытхэм фIы куэд къызэрыхуахьынур», – жиIащ Егоровэ Татьянэ.
Зэхуэсым хэтхэм псалъэ гуапэкIэ зыхуагъэзащ Сэхъурокъуэ Хьэутийрэ Езауэ Анзоррэ. Абыхэм я псалъэм къыхэщащ егъэджакIуэр гушхуэ зыкIуэцIылъ цIыхуу зэрыщытыр, абы и Iэдакъэ къыщIэкIри, и щIэныгъэм къихьри зэрыщыту ныбжьыщIэхэм я дунейр фIагърэ дахагъэкIэ зыгъэгъагъэ Iэужьу къызэрыщIэкIыр.
ЕгъэджакIуэмрэ унэтIакIуэмрэ я илъэсым хуэфащэуи пежьащ – щIыналъэм и егъэджэныгъэ IэнатIэм къыщыхэжаныкIа, лэжьыгъэм ехъулIэныгъэфIхэр щызыIэрызыгъэхьа егъэджакIуэ щэ ныкъуэм фIыщIэ тхылъхэмрэ дамыгъэхэмрэ иратащ.
Зэхуэсыр Тэрч къалэм дэт лицей №1-м, Бахъсэн къалэм дэт курыт еджапIэ №4-м, Прохладнэ щIыналъэм и егъэджакIуэхэм я уэрэджыIакIуэ гупхэм, «Шэджэмдэс ныбжьыщIэхэр» ансамблым ягъэдэхащ, гъэсэныгъэм, хэку лъагъуныгъэм, егъэджакIуэхэм ятеухуа уэрэдхэмрэ гъэлъэгъуэныгъэхэмкIэ цIыхухэм я гукъыдэжыр къаIэтащ.
ШУРДЫМ Динэ.
