КъМР-ни Башчысы Казбек Коков КъМР-ни жарыкъландырыу эмда илму министри Анзор Езаов, Нальчик шахарны жер-жерли администрациясыны башчысы Таймураз Ахохов бла да бардырылгъан ишчи кенгешде республиканы ара шахарында билим бериуню андан ары игилендире барыуну амалларын сюзгенди.
Быйыл Нальчикде 3 жангы мектепни къурулушлары башланырыкъдыла. Алай бла 2300 окъуу жер къошуллукъду. Эки мекям – Горныйде, бири да Вольный Ауулда ишленирикдиле. Аны бла бирге дерсле бардырылыучу кабинетлени шёндюгю стандартлагъа кёре хар керекли зат бла жалчытыугъа да эс буруллукъду.
Башха муниципалитетледе да, ол санда Александровскоеде, Прималкинскоеде, Терекде, Нарткъалада, Экинчи Чегемде, Терс-Къолда да – мектеплени къурулушлары башланырыкъдыла. Быйыл дагъыда Нальчикде, Бахсанда, Прохладныйде, Псынабода, Красносельскоеде, Сармаковода бла Майскийде школла хайырланылыргъа берилликдиле. Биринчи сентябрьде Кубада, Прохладныйде бла Нарткъалада да сабийле жангы мектеплеге барлыкъдыла.
Казбек Коков къырал келишимлеге кёре бардырылгъан подряд ишлеге дайым да къаты контроль этерге буюргъанды. Окъутуу тынгылы къуралырына, жангы амалла бютюн къыйматлы хайырланырларына энчи эс бурургъа керек болгъанын да эсгертгенди.
КъМР-ни Башчысы 2020 жылны башында кёп школлагъа тынгылы ремонт этерге, бир-бир жерледе уа мекям эски болуп, окъуу жерле да жетмегенлери ючюн жангыларын ишлерге керек болгъанын эсгертгенди. «Бюгюнлюкде Президентибиз Владимир Путинни оноуларыны хайырындан билим бериуде хал арталлыда тюрлене турады. Битеу салыннган борчланы толтурмай къоярыкъ тюйюлбюз»,- дегенди ол, деп билдиргендиле КъМР-ни Башчысыны бла Правительствосуну пресс-службасындан.