Си фIэщ хъуркъым уи сабиигъуэр щыбгъэкIуа еджапIэмрэ балигъ гъащIэм ухуэзыгъэхьэзыра егъэджакIуэхэмрэ, сыт хуэдэ ехъуэлIэныгъэ уиIэу уемыджами, пщызыгъэгъупщэн щыIэу. Нэхъри ягури, я псэри етарэ, узыхурагъаджэм куууэ хэзыщIыкIхэр къыпщхьэщытамэ. Си насып къикIри, сэ сыщеджащ Бахъсэн районым сыт и лъэныкъуэкIи бжьыпэр пIалъэ кIыхькIэ щызыIыгъа, Зеикъуэ къуажэ дэт езанэ курыт школым. Апхуэдэ ехъулIэныгъэ мы еджапIэм щIиIэнкIэ хъуауэ къэслъытэмрэ гукъэкIыж гуапэхэмрэщ мы тхыгъэ кIэщIыр зытеухуар. Шэч лъэпкъ къытесхьэркъым апхуэдэ гулъытэ зи цIэ къисIуэнухэм къызэралэжьам. Ди жагъуэ зэрыхъунщи, зыбжанэщ а цIыху гъуэзэджэхэм ящыщу нобэкIэ псэууэ къэнэжар.

Зи гугъу фхуэсщIыну сызыхуей школым сыщыщеджар 70 гъэхэрщ. 1960 гъэхэм икIэм апхуэдизкIэ жьы хъуат, щеджэну къекIуалIэ сабийм я бжыгъэм хэхъуати, IэмалыншагъэкIэ еджэпIэщIэ къатитI хъууэ, спортзал, шхапIэ, зэхуэс зэмылIэужьыгъуэхэр щебгъэкIуэкI хъун пэшышхуэ хэту зэрытхуаухуэм егъэлеяуэ дригуфIэрт икIи дригушхуэрт. Школ дахэшхуэр къыщызэIуаха махуэр си фIэщ хъуркъым а зэманым мыбы щеджауэ зыщыгъупщэжа къыпхуэгъуэтыну. Дауи, сабий насыпкIэ узэджэ хъун Iуэхугъуэ дахэт ар. Зи гугъу фхуэсщIыну школыр къызэрызэIуахрэ иджыблагъэ илъэс 50 ирикъуащи, сыхуейт абы теухуа си гукъэкIыжхэмкIэ сывдэгуэшэну. Шэч хэмылъу, псом япэ игъэщыпхъэщ школым и пщIэр лъагэу зыIэтахэу еджапIэм и унафэщI жыджэру куэдрэ лэжьа Маршэнкъул Хьэсэнбий, егъэджэныгъэмкIэ абы и къуэдзэу щыта Къазий Ахьмэд, гъэсакIуэ, егъэджакIуэ пажэхэу Къумыкъу Лъостэнащ, иужькIэ илъэс куэдкIэ директору лэжьа АбытIэхэ Хьэжмурат, егъэджакIуэхэу Рае, Мухьэмэд, Уетхэ Аслъэнбийрэ Зоерэ, Унэж МэчрэIил, Лосэн Анзор, Щомахуэ Хьэсэнбий, Щауэ Ждин, Шэрхъхэ Тэужан, Хьэлимэт, БетIал, Хьэмырзэ Зое, Бейтыгъуэн Сэлым, Шурдым Зэлым, Дэгу Чэрим, Къалмыкъхэ Зоерэ Аминатрэ, ЛIизэм Жаннэ, Тенджыз Зэхьирэт, Шыдхэ Владимир, Наталье, Галинэ, ХьэцIыкIу Лолэ, ХьэпцIэ Тэмарэ, ГъукIэ Хьэчим, Къундет Тосэ, Джэдгъэф ФатIимэ, Шурдым Рае сымэ я фIыщIэкIэ школыр Бахъсэн районым япэ увыпIэр щиIыгъыу, щытхъу тхылърэ саугъэт мымащIэрэ къыхуагъэфащэу, щапхъэу къекIуэкIащ.
Мыбдеж, псом япэу, къыхэгъэщыпхъэщ икIи фIыщIэ хуэщIыпхъэщ емызэшу лэжьыгъэр къызэгъэпэщыным хуэунэтIауэ ехъулIэныгъэ иIэу жыджэру лэжьа директор Маршэнкъул Хьэсэнбий. Егъэджэныгъэр, гъэсэныгъэр, гупым я зэхущытыкIэр егъэфIэкIуэным и нэIэ тригъэтым имызакъуэу, абы хуабжьу гулъытэ хуищIырт езы школыр сыт и лъэныкъуэкIи зыхуей - зыхуэфIхэмкIэ къызэгъэпэща хъуным. Хьэсэнбий и лэжьакIуэхэр зэхэдз ищIакъым, дэтхэнэ зыми бзэ къыхудигъуэту, гуапэу хущытащ, зыхуейр зы закъуэт - я пщэ дилъхьар гугъэзагъэу, ныкъусаныгъэншэу ягъэзэщIэнырт.
Мы тхыгъэм зи цIэ къыщитIуа дэтхэнэ зыми щхьэхуэу псалъэ гуапэ хужыпIэ зэрыхъунум щыхьэт техъуэфын нэхъыжьыфI куэд дэсщ Зеикъуэ жылагъуэм. Тхылъ къахудэбгъэкIыну къэзылэжь гупщ зи гугъу фхуэсщIар. Абы шэч хэлъкъым. Псэ хьэлэлкIэ зи лэжьыгъэр зыгъэзэщIахэм я цIэр уахътыншэ хъуагъэххэщ.
 

ШАФИЙ Аслъэн.