Зольск районну  «Россети Северный Кавказ» - «Каббалкэнерго» биригиуню эм жетишимли ишлеген бёлюмюне  саналгъанды. 

Биригиуге 2016 жылдан бери уллу сынамы болгъан  Заурбек Яганов башчылыкъ этеди. Бюгюнлюкде аланы иш кёллюлюклерини хайырындан 11 минг абонент, ол санда 649 организация ток бла сылтаусуз жалчытылынадыла.   Орта эсеп бла алып айтханда, районда жашагъанла  4 миллион кВт сагъат ток къоратадыла.

- Ишибизни жетишимли бардыргъаныбызны баш сылтауларындан бири, ол специалистлерибизни бирлешип къармашханларынданды. Аны бла бирге абонентлени асламысы  болумну ангылайдыла эм районну  администрацияны жанындан да ахшы билеклик этиледи.

Былтырны эсеплеге кёре, токну хайырланнганланы барысы да, 251 миллон сом тёлеп, борчларыны 99 процент чакълы бирин жапхандыла.   Сёз ючюн,  жашау журт-коммунал мюлк предприятиялача тёлерге осал абонентле окъуна  озгъан жылда борчларыны 80 процентге азайтхандыла. Быйылны юсюнден айтханда да, кючюбюзню аямай ишлерге таукелбиз,- дегенди Заурбек Яганов.

Бизни корр.