Къашхатауну ортасында алгъын ханс басып, кир-кипчик да жыйылып тургъан жерде бусагъатда тизгинли, кёзге да ариу кёрюннген «Дана» деген аты бла сабий солуу парк орналгъанды. Ол ачылгъанлы быйыл юч жыл болады.  Эллиле ары жылны не заманында да, къарды, жауунду, къызыуду деп къарамай, сабийлери бла барып, кеслери да солуп, балаларын да тюрлю-тюрлю  аттракционлада учуруп, зауукълукъ  табадыла.

-Къызчыгъыбыз ажымлы ауушханында, аны аты бла къурагъан эдик бу терек бахчаны. Баш ием Къулбайланы Борисни жашы Алан  анга артыкъда уллу къыйын салгъанды. Аттракционланы барысыны да сертификатлары бардыла. Бери келгенлени тилеклери бла ашханачыкъ да ачханбыз. Ичги жюрюмейди, аш-сууну  уа къаллайы да  барды.

Хычинле ашаргъа келгенле  бютюн кёпдюле,-дейди паркга иелик этген Къулбайланы Зухура, Асанланы Керимни къызы. Ол хар байрамда, бютюнда бег а оразада, къурманда, Даначыкъны туугъан, ауушхан кюнлеринде да,  сабийлени чакъырып,  тюрлю-тюрлю аш-суу бла сыйлайды.

Мында  къызыуда, сууукъда, жауунда, къарда да къыйналмай олтурурча  онгла къуралгъандыла. Терек бахчада уа  тау этекледе артыкъ тюбемеген японлу сакура окъуна ёседи. Атылып тургъан жерни тап халгъа келтириуге  Ростовда «Черек-1»-Гранит» фирманы башчысы Холамханланы Анатолий, элли Мамуколаны  Марат, ростовчу  предприниматель Константин Алавердов, дагъыда кёп башхала кеслерини тийишли юлюшлерин  къошхандыла.

-Бу  керти да бек огъурлу эмда керекли ишди. Аны бла Къулбай улу уллу сууаплыкъ тапханды,  къаллай бир сабийни къууандырады бу аттракционланы ачып,-дейди Черек районда  ветеран организацияны таматасы  Чеченланы Георгий.

Мен паркга баргъанымда, Зухура, кюнню иссилигине да къарамай, къолуна уллу къыптыны алып, хансланы къыркъа, ишлей тура  эди. «Бу тийрени быллай тап халгъа специалистле-дизайнерле келтиргендиле. Ала дайым да келип, халгъа къарап турадыла, алай  мен  кесим да аз-аз къол жетдире  турама»,-дейди ол.

Биз ушакъ эте тургъунчу, алайгъа аппасы, ыннасы бла къызчыкъ, башха къонакъла да келгендиле. Кафеде ишлегенле Бёзюланы Рита, Бийчеккуланы Арина, шишликле биширген  Хоханаланы Арсен а аланы тилеклерин мычымай толтура эдиле. Тёгерекде тизгинлик, тазалыкъ, айбатлыгъ  а кёзню къууандырады,  кёлню кётюреди.  

Холаланы Марзият.