Зольск районда  авария болдургъан инсаннга   РФ-ни УК-сыны 264-чю статьясыны  3-чю кесегине кёре уголовный иш ачылгъанды. Ол  жолда жюрюуню жорукъларына бузукълукъла этип, сунмай,  бир адамны ёлтюргени ючюн терсленеди.

Былтыр сентябрьде Дагъыстандан 26-жыллыкъ жаш адам «Тойота» машинасында Пятигорскну къыйыры бла ётген жолну Зольск районда кесегинде «КамАЗ» бла къагъышханды. Алайда  женгил машина баштёбен болгъанды. «Тойотада»  келген 41-жыллыкъ тиширыу ауур жарала алып, алайда  ауушханды, энтта экеулен а саулукъ сакълау учреждениялагъа жетдирилгендиле.

Уголовный  ишни тинтген кезиуде 5 экспертиза бардырылгъанды. Аладан ачыкъланнганыча, авария тыш къыраллы машинаны водители жолда жюрюрге эркин этилген мардадан терк баргъаныны эмда аллында транспортну бла кесини араларында кенгликни сакъламагъаныны хатасындан болгъанды.

Уголовный иш Зольск районну сюдюню къараууна берилгенди, деп билдиргендиле бизге КъМР-де МВД-ны пресс-службасындан.

Жол-транспорт болумну шагъатларын  излейдиле

Къырал автоинспекторла Нальчикде аварияны кёргенлени излейдиле. Белгисиз водитель 62-жыллыкъ эр кишини басдырып, авария болгъан жерден къачып къутулгъанды.

Былтыр 20 сентябрьде ингирде бирни жарымында  эр киши Головко атлы орамда юйюне бара болгъанды.  Аны жолда машина басдырып, водитель тохтамай, къачып кетгенди. Эр киши аны къырал номерлерин неда маркасын эслемегенди.

Бу жол-транспорт болумну юсюнден жукъ билгенлени, аны кёргенлени 8-928-715-00-03 телефон номерге сёлеширлерин тилейдиле право низамны сакълаучула. Неда шартланы Нальчикде УМВД-ны дежурный бёлюмюне айтыргъа да боллукъду.

Къырал автоинспекторла   РФ-ни Административ бузукълукъланы кодексини 12.27-чи статьясына тийишлиликде, жолда жюрюуню жорукъларын бузуп, авария этген жерден къачып къутулгъан водительни транспортну жюрютюрге эркинлиги 1-1,5 жылгъа сыйырылыргъа, неда анга 15 кюннге административ арест салыныргъа боллугъун эсгертедиле.

Тикаланы Фатима хазырлагъанды.