Быйыл биринчи  январьдан башлап къыралны эл мюлкде уруннганларына   картоф бла башха  тахта кёгетлени  ёсдюрюрге  болушлукъ  берирча   федерал проект ишлеп башлагъанды.  Аны бла байламлы Къабарты-Малкъаргъа да бюджетден 72,87 миллон сом бёлюнюрюкдю. 

Субсидия тахта кёгет, ол санда картоф ёсдюргенлеге къоранчларыны бир кесегин жабарча, иги урлукъла чыгъарыргъа болушурча, бай эм качестволу  тирлик алырча тийишли жумушланы тамамларгъа эм  жерни игилиендирирча   ишле бардырыргъа берилликди.

Къыралдан  болушлукъну уллу, орта эм гитче  мюлкледен тышында, кеслери алларына бахчачылыкъ бла кюрешгенле  алаллыкъдыла. 

Саулай алып айтханда, жерчиликде къармашханлагъа быллай  болушлукъ ахшы билеклик этерикди эм тахта кёгетчиликни айнытыуда да  уллу къошумчулукъ  боллукъду.  

Бюгюнлюкде окъуна тахта кёгетчилик жаны бла республикада ахшы кёрюмдюле къууандырырчадыла. Шимал-Кавказстатны эсеплерине кёре, былтыр тахта кёгетлени барындан да 338,8 минг тонна тирлик жыйылгъанды.  Буруннгу жыл бла тенглешдиргенде,   ол 7,6 процентге кёпдю.  

Картофну юсюнден айтханда да,  сагъынылгъан кезиуде 147,8 минг тонна алыннганды. Мында да 105,5 процент чакълы ёсюм эсленеди.  Аны бла бирге былтыр арендаторла тахта кёгетчиликге  бёлюннген  жерлени 7,5 эм картоф ёсдюрюлген бахчаланы да 5 процентге кёбейтгендиле. 

Магометланы Сулейман.