Фатарда ремонт ишле бардыргъандан сора, бирде анда болгъан тюрлениулени, жеринден тепдирилмеген мюлкню бирикген реестрине (ЕГРН) тюшюрюрге керек болады. Росреестрни Федерал кадастр палатасыны специалистлери, бу иш къачан эмда къалай этилиучюсюню юсюнден тынгылы ангылатхандыла.

Фатарда эки тюрлю тюрлениу болуучуду: перепланировка эмда переустройство.

Отоулада къабыргъаланы оюп, неда аллай жангыларын къалап, эшиклени кетерип неда, башха къабыргъалада алагъа жангы орунла къурагъан ишлеге перепланировка дейдиле. Газ печни, котёлну, санузелни башха жерлеге кёчюрюуге, газ печни ток печге алышыугъа, инженер-техника коммуникацияланы тюрлендириуге уа -  переустройство.

Фатарда ремонтну къайсы тюрлюсю этилгенден сора да, аланы законлу халгъа кёчюрмей жарарыкъ тюйюлдю. Госстройну 170 номерли бегимине тийишлиликде, ол информацияны кёп фатарлы юйню техника паспортуна тюшюрюрге керекди.

Планировка тюрлендирилгени себепли фатарны уллулугъу азайыргъа неда кенгерилирге боллукъду. Аны да ЕГРН-де кёргюзтмей жарарыкъ тюйюлдю. Ол дагъыда эки фатарны бирге къошханда, бирин талай кесекге бёлгенде, юйде жашагъанланы барыны да иелигинде болгъан мюлкню юлешип, фатар сайын бергенде да тюрленирге боллукъду. Алай бла, жашау журт уллуракъ болса, аны кадастр багъасы да кётюрюледи. Анга кёре уа мюлк ючюн тергелген налогну ёлчеми да.

Реестрге информацияны тюшюрюр ючюн, фатарда болгъан тюрлениулеге кёре аны техника планын жарашдырыргъа керекди. Аны кадастр инженер этеди. Ызы бла перепланировка неда переустройство бошалгъанына проектни дурус кёрген органны комиссиясындан шагъатлыкъ этген актны алыргъа. Нек дегенде РФ-ни Жашау журт кодексини 28 номерли статьясыны биринчи кесегинде белгиленнгенича, кёп фатарлы юйде перепланировка этилип бошалгъанын ол акт кёргюзтеди.

Бу документле бла ЕГРН-ге жангы информация жиберирге боллукъду. Аны перепланировка проектни дурус кёрген орган тамамлайды. Онбеш кюнню ичинде реестр жангыртылады. Ызы бла, беш кюнден кеч къалмай, фатарны иесине тийишли билдириу жибериледи. Алай, сагъынылгъан актны, аны жарашдырыргъа тийишли орган угъай, башха ведомство берсе, информацияны реестрге къошарыкъ тюйюлдюле.

Регистрацияны юсюнден Законда айтылгъаннга кёре, фатарда болгъан тюрлениулени реестрге тюшюрюрча, иеси неда аны келечиси да берирге боллукъдула заявленияны. «Кадастр палата уа юч кюнню ичинде фатарда тюрлениуле этерге эркинлик берген органдан документлени сурайды. Ала болмагъаны ачыкъланса, информация ЕГРН-ге тюшерик тюйюлдю», - дегенди Росреестрни Федерал кадастр палатасыны эксперти Надежда Лещенко.

Ведомствону онлайн-сервисинден (https://kadastr.ru/services/zakaz-vypisok-iz-egrn/) «Жеринден тепдирилмеген мюлкню юсюнден» выписка алыргъа боллукъду. Анда фатарны ёлчеми уллуракъ болгъаны кёрюнюрюкдю.

Интернетде ЕГРН-ден информация берген кёп сайт барды. Алай алагъа ышаныргъа керекмейди. Нек дегенде ала берген информация терс болургъа боллукъду. Тюзю керек эсе уа, Кадастр палатагъа, МФЦ-гъа барыгъыз, «Госуслуги» порталны неда Росреестрни бла палатаны электрон сервислерин хайырланыгъыз, деп чакъырадыла КъМР-ни Экономиканы айнытыу министерствосунда.

Улбашланы Мурат хазырлагъанды.