Адам кесини жеринден тепдирилмеген мюлкюн хыйлачыладан сакъларгъа боллукъду. Аллай онг «Жеринден тепдирилмеген мюлкню къырал регистрациясыны юсюнден» закон бла бериледи. Бизни республикада жашагъан минг бла жарым инсан аны хайырланнгандыла. Ала Росреестрге ишин этип бармасала, мюлклерини юсю бла не тюрлю да регистрация жумушланы тамамларгъа чек салынады. Аны къаллай этерге боллугъуну юсюнден КъМР-ни Экономиканы айнытыу министерствосундан билдиргендиле.

Быллай мюлкню иеси болгъан ким да заявление жазып, аны мюлкю бла байламлы регистрация жумушланы ол кеси жеринде болмай тамамларгъа жарамазча этерге боллукъду. Аллай чек тийишли къырал реестрге тюшген, кесини да иелиги закон бла белгиленнген халда тохташдырылгъан мюлкге салынады.

Заявленияны Росреестрни сайтында (https://rosreestr.gov.ru/), МФЦ-ны бёлюмлеринде берирге неда «Роскадастрда» тийишли жумушну хайырланып жазаргъа боллукъду. Аны дагъыда «Госуслуги» порталда тамамларгъа жарайды. Ахыргъы амалны сайлагъанладан электрон къол салыу изленмейди, хакъсыз эмда кючлендирилген электрон сертификатны уа «Госключ» приложенияда жарашдырыргъа боллукъду.

Заявление бла бирге паспортну кёргюзтюрге эмда мюлкню кадастр номерин айтыргъа керек боллукъду. Ол Росреестрге берилгенден сора, къырал реестрде ол мюлкню юсюнден тийишли белги этиледи. Аны бла байламлы сатыу-алыу неда башха тюрлю жумушла тамамлау документле келселе, мюлкню иеси келмей алагъа къараллыкъ тюйюлдю. Ала иени закон бла белгиленнген келечилери болсунла, аланы къолларында нотариусдан шагъатлыкъ этген документлери да болсун – башхасы жокъду. Аны къой, нотариусха эмда аны болушлукъчусуна да салынады ол чек. Битеу тюрлю жумушла эмда келишимле – жаланда мюлкню иеси кеси келип алай!

Алай бла гражданин быллай мюлкюн сатар умутлу тюйюл эсе, ол аллай чек салса иги боллукъду. Къырал реестрде аллай жазыу болса, ол къорууланнганнга саналлыкъды.

Бу айтылгъан затланы этген адам артда мюлкюн сатаргъа сюйюп, алай офисге келир онгу болмаса уа не этсин? Башында белгиленнген амалла бла ол чек къалай салыннган эсе да, тюз ма алай тешиледи. Ызы бла уа ышаннган адамына тийишли къагъыт берип ашырыргъа боллукъду офисге. Чек салыу эмда тешиу жумушла юч ишчи кюнню ичинде тамамланадыла.

Улбашланы Мурат хазырлагъанды.