ИлъэсыщIэр къихьэн и пэ къихуэу КъБР-м и Iэтащхьэ КIуэкIуэ Казбек Правительствэм и Унэм щаритыжащ къэрал дамыгъэхэр зыхуагъэфэща IэщIагъэлI пашэхэм.
Медицинэм, егъэджэныгъэм, щIэныгъэм, щэнхабзэм, гъуазджэм, ухуэныгъэм, экономикэм, спортым, нэгъуэщI IэнатIэхэм хэлъхьэныгъэ хуэзыщIа защIэт гулъытэ лъагэ зыхуащIа цIыху 64-р. Абыхэм я Iэзагъыр, зэфIэкIыр, жэуаплыныгъэр къэралми республикэми гулъытэншэу къагъэнакъым. Я къалэнхэр нэгъэсауэ зэрагъэзащIэм, республикэм щекIуэкI Iуэху-хэм жыджэру зэрыхэтым, илъэс куэд хъуауэ хьэлэлу зэрылажьэм я фIыгъэкIэ, УФ-м, КъБР-м я дамыгъэхэр къалэжьащ.
ЗэIущIэр къыщызэIуихым, КIуэкIуэ Казбек жиIащ: «Дэ идогъэжьэж ди къэралым дежкIэ тыншу щымыта, мыхьэнэшхуэ зиIа Iуэхугъуэхэр къыщы-хъуа илъэсыр. Абы дэ щытлъэгъуащ Хэкур дэтхэнэ зым дежкIи зэрылъапIэр, абы и къэкIуэнум дэркIэ мыхьэнэшхуэ зэриIэр, ар тхъумэн, дызэкъуэтын зэрыхуейр. Апхуэдэ гупсысэщ Къэбэрдей-Балъкъэрым исхэм я нэхъыбэм яIэр.
Дэ диIэ хъугъуэфIыгъуэхэм, ди къарум дызэрыщыгугъыр нэхъри егъэбагъуэ Хэкур яхъумэу нобэ зауэ губгъуэм ит ди щIалэ хахуэхэм я лIыгъэм, дзэ Iуэху хэхахэр щекIуэкI щIыпIэхэм къимыкIуэту кIуэ, къэралым къыщхьэщыжыну зи гуращэ ди щIалэгъуалэм. Абыхэм ящыщ дэтхэнэ зыми дропагэ, шэч хэмылъу, икIи гулъытэ зэрахуэтщIыным иужь дитщ.
Пщэдейрей махуэм фIыкIэ дыщогугъ, дауи. Сыт хуэдиз лъэпощхьэпо къытхукъуэмыкIами, мы гъэр тэмэму къызэднэкIыфащ, гъащIэм и лъэныкъуэ псомкIи хэхъуэрэ зыужьыныгъэрэ диIащ. Экономикэм и IэнатIэ псоми щыдгъэува къалэнхэр къыдэхъулIауэ жыпIэ хъунущ. КъыщIэдгъэкIхэм я бжыгъэм хэхъуащ, мэкъумэш IэнатIэм зиужьри, абы къыдитри нэхъыбэ хъуащ, туризмэм ехьэлIа ухуэныгъэхэр йокIуэкI. Экономикэм дэIэпыкъуэгъуфI хуэхъуащ федеральнэ, республикэ мылъкукIэ IуэхущIапIэхэм зэрызащIэдгъэкъуар. БлэкIа илъэсым хуабжьу делэжьащ инвестицэ проектхэмрэ щIыналъэ программэхэмрэ гъэзэщIэным. Экономикэм нэхъ жыджэру къыщыдгъэсэбэп хъуащ иджырей технологиехэр, нэрылъагъуу ефIэкIуащ хьэрычэтыщIэ Iуэху мащIэмрэ ику итымрэ. А псоми хагъэхъуащ республикэм и мылъкур. Илъэсым и кIэм ирихьэлIэу ди хэгъэгум езым и хэхъуэр сом мелард 16-м нэблэгъащ, ар блэкIа илъэсым диIам нэхърэ процент 20-кIэ нэхъыбэщ. А ахъшэр зытедгъэкIуэдэнур цIыхухэм я псэукIэр егъэфIэкIуэнырщ.
Илъэсым къриубыдэу егъэджэныгъэ IуэхущIапIэхэр, узыншагъэм щыкIэлъыплъ, щрагъэфIакIуэ сымаджэщхэр, спорт, щэнхабзэ уардэунэхэр яухуащ. Апхуэдэуи къалэхэр, къуажэхэр, гъуэгухэр, пщIантIэхэр зыхуей хуэгъэзэнымкIэ куэд зэфIэдгъэкIащ. А псомкIи сэбэп хъуащ УФ-м и Президентым къыхилъхьауэ дызэлэжь лъэпкъ проектхэр.
2022 гъэм Къэбэрдей-Балъкъэр Республикэр илъэси 100 зэрырикъуар Iэтауэ дгъэлъэпIащ. Мыхьэнэшхуэ зиIэ а тхыдэ Iуэхугъуэм ди цIыхубэр нэхъри зэкъуигъэуващ. А Iуэхум теухуа гуфIэгъуэ дауэдапщэхэр зыхуей хуэзэу щекIуэкIащ республикэми ди къэралым и къалащхьэ Москваи икIи ди лъахэм и Iулыджыр къиIэтауэ къызолъытэ».
Iэтащхьэм и къэпсэлъэныгъэм дыщIигъуащ апхуэдэ ехъулIэныгъэхэр республикэм ис цIыху лэжьакIуэхэм я фIыгъэу зэрыщытыр, ягъэлъапIэ IэщIагъэлI пашэхэм я гуащIэ абы зэрыхэлъыр.
Урысей Федерацэм и Президентым и УнафэкIэ, жылагъуэ лэжьыгъэр жыджэру зэрыригъэкIуэкIым щхьэкIэ «Хэкум и пащхьэ щиIэ фIыщIэм папщIэ» орденым и етIуанэ нагъыщэр хуагъэфэщащ ветеранхэм я «Боевое братство» урысейпсо жылагъуэ зэгухьэныгъэм и щIыналъэ къудамэм и ГъэзэщIакIуэ комитетым и Iэтащхьэ Абанокъуэ Владимир.
КъБР-м и ЩIыхь тхылъыр иратащ цIыху 26-м; «КъБР-м и цIыхубэ артист» цIэ лъапIэр фIащащ «Кабардинка» къэрал академическэ ансамблым и художественнэ унафэщI Атэбий Игорь; республикэм и IэнатIэ зэхуэмыдэхэм щыпэрыт цIыху 30-м «КъБР-м щIыхь зиIэ и лэжьакIуэ» цIэр фIащащ; КъБР-м и Iэтащхьэм и фIыщIэ тхылъыр хуагъэфэщащ цIыхуи 6-м.
Кърата къэрал дамыгъэм папщIэ къэралым, республикэм я унафэщIхэм фIыщIэ хуащIу, апхуэдэ гулъытэм дяпэкIэ нэхъыбэжым зэрытригъэгушхуэр жаIэу зэIущIэм къыщыпсэлъащ ягъэлъэпIахэр.
ГуфIэгъуэ зэхыхьэм хэтащ КъБР-м и Парламентым и УнафэщI Егоровэ Татьянэ, КъБР-м и Правительствэм и УнафэщI Мусуков Алий, КъБР-м и Iэтащхьэм и Администрацэм и УнафэщI Къуэдзокъуэ Мухьэмэд, УФ-м и Президентым и лIыкIуэу Кавказ Ищхъэрэ федеральнэ округым щыIэм и аппаратым и федеральнэ инспектор нэхъыщхьэу КъБР-м щыIэ Мэкъуауэ Тимур сымэ.
НэщIэпыджэ Замирэ.