КъБР-м и Iэтащхьэ КIуэ­кIуэ Казбек блэкIа илъэсым и иужьрей махуэхэм щы­- Iащ «Узыншагъэр хъумэн» лъэпкъ проектым хагъэхьа медицинэ IуэхущIапIэ зыбжанэм.

Республикэм и Уна­фэщIым зригъэлъэгъуащ «ЦIыхухэм япэ медицинэ дэIэпыкъуныгъэхэр щыхуа­щIэ IуэхущIапIэхэр къэгъэ­щIэрэщIэжын» программэмкIэ зэрагъэпэщыжа, Налшык къалэ дэт сабий поликлиникэ №1-р. 60 гъэхэм яухуа унэр метр зэбгъузэнатIэу 1620-рэ хъууэ арат, абы къыхэкIыуи цIыкIухэр зыхуей дэIэпыкъу­ныгъэр хуиту хуащIэну Iэмал яIэтэкъым. Ар къалъытэри, IуэхущIапIэм иубыд щIыналъэм хуэдитIкIэ хагъэхъуащ, ухуэныгъэ щхьэхуэ къыпащIыхьри. Поликлиникэм сабий мин 65-рэ епхащ, махуэ лэжьэгъуэм къриубыдэу абы йокIуалIэ цIыху 350-рэ. ОРВИ узыфэм и нэщэнэхэр зиIэ ­сабийхэм папщIэ щIыхьэпIэ щхьэхуэ ящIащ. Ухуэныгъэ­щIэм хэтщ махуэм цIыкIухэм щеIэзэну сымаджэщ, хирургие, реабилитацэ къудамэхэр. Дохутырхэм я лэжьыгъэр зыхуей хуэзэу къызэгъэпэ­щауэ, сабийхэм хуащIэ ме­дицинэ Iуэхутхьэбзэхэм фIагъышхуэ иIэу щытыным ­хуэ­щIауэ ирагъэкIуэкIащ ­зэ­гъэпэщыжыныгъэ лэ­жьы­гъэхэр. А проектым три­гъэ­кIуэдэну республикэм хухахауэ щытащ сом мелуан 80-м нэблагъэ. 
КIуэкIуэ Казбек яхуэзащ поликлиникэм и лэжьакIуэхэм икIи яжриIащ IуэхущIапIэр иджырей IэмэпсымэхэмкIэ къызэрызэрагъэпэщынур. 
Бахъсэн район сымаджэщым и поликлиникэ къудамэу Дыгулыбгъуей къуа­жэм дэтри сыт и лъэны­къуэкIи зыхуей хуэзэу зэрагъэпэщыжащ. IуэхущIапIэм ме­дицинэ дэIэпыкъуныгъэ­-хэр щыхуащIэ жылэдэс мин 17,5-м, махуэ лэжьэгъуэм ­къриубыдэу абы йокIуалIэ цIыхуи 150-рэ. Поликлиникэр нэхъ ин ящIащ, балигъхэмрэ сабийхэмрэ зэхагъэщхьэхукIащ икIи щIыхьэпIэ зырыз яIэ хъуащ. Сабийхэм щеIэзэ къудамэр япэ къатым щыIэщ. КъищынэмыщIауэ, поликлиникэр къызэрагъэпэщащ ­стоматологие, диагностикэ ­оборудованэхэмкIэ, рентген ­щащI пэш хэтщ, пIащIэгъуэ­кIэ цIыхухэм медицинэ дэ­Iэпы­къуныгъэ щыхуащIэ Iэ­натIи къыщызэIуахащ. А псоми текIуэдащ сом мелуан ­65,2-рэ.
Шэрэдж районым хыхьэ Аушыджэр къуажэм поликлиникэщIэ щаухуащ «ЦIыхухэм япэ медицинэ дэIэпыкъуныгъэхэр щыхуащIэ IуэхущIапIэхэр къэгъэщIэрэщIэжын» программэмкIэ. Абы медицинэ дэIэпыкъуныгъэхэр щагъуэт къуажэдэс мини 5-м. 1938 гъэм ящIауэ щыта унэр кхъахэ дыдэт хъуат, иджы абы и пIэ къиуващ иджырей мардэхэм тету яухуа, метр зэбгъузэнатIэу 580-рэ хъу ухуэныгъэр. Амбулаторэм и къудамэ псори хуиту зэ­ры­щIэхуэм къищынэмыщIауэ, абы хэту къызэIуахащ цIыху­хэм махуэкIэрэ щеIэзэну пэшхэр. Нэхъапэм амбулаторэм и махуэ лэжьыгъэр цIыху 35-м тещIыхьауэ щытамэ, иджы хуэдитIкIэ нэхъыбэм дэIэпыкъуныгъэхэр щагъуэтынущ. Ухуэныгъэм ­хухахауэ щытащ сом мелуан 32,8-рэ.
КIуэкIуэ Казбек медицинэм и лэжьакIуэхэм ехъуэхъуащ илъэсыщIэмкIэ, ухуэныгъэ­щIэ­хэм ехъулIэныгъэхэр къахудэкIуэну, я IэнатIэм зэфIэкI лъагэхэр щызыIэрагъэхьэну зэригуапэр къыхигъэщу.
Абыхэм къадэкIуэу илъэ­сыщIэм и япэ махуэхэм ­КъБР-м и Iэтащхьэм зригъэлъэгъуащ Налшык дэт къалэ клиникэ сымаджэщ №1-м и пщIантIэм къыщрагъэжьа поликлиникэ №1-м и къудамэщIэм и ухуэныгъэхэр зэрекIуэкIыр. 
Унэм и лъабжьэр ягъэтIы­лъащ, ухуакIуэхэм абы и япэ къатым и блынхэр дращIей. Метр зэбгъузэнатIэ мини 10-м щIигъу къызэщIэзыубыдэну поликлиникэм махуэ лэжьэгъуэм хуэзэу цIыху 500 екIуэ­лIэфынущ. Ар республикэм и поликлиникэ нэхъ ин дыдэу щытынущ.
Проектыр ягъэзащIэ УФ-м и Президент Путин Владимир цIыхухэм япэ дэIэпыкъуныгъэхэр щыхуащIэ IуэхущIапIэхэр къэгъэщIэрэ­щIэжы­ным теухуауэ къигъэлъэгъуа пщэрылъхэм тету. Федеральнэ бюджетым къыхэкIыу ухуэныгъэм хухахащ сом ­мелуан 706-рэ.
«Мы Iуэхур зэфIэхынымкIэ щIэгъэкъуэнышхуэ къытхуэхъуащ УФ-м и Правитель­ствэмрэ Узыншагъэр хъу­мэнымкIэ министерствэмрэ. Иджырей мардэхэм хуэкIуэ поликлиникэ къызэIухыным егъэлеяуэ дыхуэныкъуэт. Зауэ зэманым ипэм яухуа, цIыху мин 80-м щIигъу зэгъэ­бы­дылIа IуэхущIапIэр и къалэным пэлъэщыжыртэкъым, дохутырхэм я лэжьыгъэри тэмэму къызэгъэпэща хъур­тэкъым, абы къекIуалIэ сымаджэхэри гугъуехь зэ­хуэ­мыдэхэм Iууэрт», - жиIащ КIуэ­кIуэ Казбек.
ПоликлиникэщIэм хэтынущ эндоскопиемкIэ, реабилитацэмкIэ, функциональнэ ­диагностикэмкIэ, цIыхубз ­уэн­дэгъухэм щакIэлъыплъ къудамэхэр, унэтIыныгъэ зэ­хуэмыдэхэмкIэ махуэ стан­­ционар, амбулаторнэу онкологие дэIэпыкъуныгъэ щы­хуа­щIэ центр. Абы щра­гъэкIуэкIынущ хирургие, эн­доскопие операцэ мы­хьэ­лъэхэр. Поликлиникэр къы­зэ­рагъэпэщынущ иджырей ­диагностикэ IэмэпсымэхэмкIэ, абыхэм яхэтынущ МРТ, КТ къэпщытэныгъэр зэрырагъэкIуэкI аппарат лъэщхэр. КъищынэмыщIауэ, мы IуэхущIапIэм хэтынущ къалэм дэт поликлиникэхэр псори зэгъэбыдылIэжауэ щытыну лабораторэ IэнатIэр. Мы поликлиникэм фIэкIыпIэ зимыIэ медицинэ страхованэмкIэ дэIэпыкъуныгъэ щагъуэты­фынущ республикэм щыпсэу дэтхэнэ зыми. 
IуэхущIапIэм и лэжьыгъэр дохутырхэми абы къекIуалIэ цIыхухэми я тыншыпIэм сыт и лъэныкъуэкIи хуэщIауэ щы­тынущ.