Жууаплылыкъ бла низамлылыкъды жетишимликни башы

Элбрус районну Элбрус элини  мектеби  узакъдан окъуна  кёзге илинмей къалмайды. Юч къатлы узун мекям, кенг, тизгинли  арбазы, къатында  уллу болмагъан спорт майдан. Бахсан черекни боюнунда бийик  тёшде кюнлюмге айланыпды. Эрттенликде  таула артындан  чыгъа келген кюн биринчи анга тиеди, ингирликде биягъы таула артына аугъунчу кабинетлени жарытханлай турады. 

 

Аны ичине кирген жерде сол жанында къабыргъада спортда окъуучула болдургъан жетишимлери ючюн алгъан грамотала тагъылыпдыла, энчи тапкада уа – тюрлю-тюрлю даражалы кубокла.  Мектеп эртте ишленнгенди, алай тизгинлилик бла тазалыкъ  кёзге илинедие. Ол халны кёрюп, къууанырыгъынг келеди. Биз мектепни ючюнчю этажына чыгъабыз. Узун, жарыкъ коридорда сейирлик экспонатладан къуралгъан аламат музей. Анда болмагъан зат жокъду: бу элде жашагъанланы тукъум тамгъалары,  кийизле, онжетинчи, онсегизинчи ёмюрледен къала келген сейирлик  чыракъ, жау  чайкъагъан орунла, таулу от жагъа, эрттегили гыранчала, дагъыда ким да эс бурурча  тамашалыкъ затла. 
Мектепни директору Непеланы Абидат, Залийханланы Ахматны къызы, бизни бла ушагъында бу окъуу юй 2020 жылда  «Ана тилим, жаным-тиним» деген конкурсха къатышып, республикада биринчи жерге чыкъгъанын ёхтемленип айтады. «Анга уа бизни бу музейибиз да себеплик этгенди. Анга устазларыбыз, окъуучуларыбыз да уллу къыйын салгъандыла. Мында экспонатла кёп тау элледен келтирилгендиле. Аланы хар бирини да энчи тарыхы барды. Мектеп – бош  мекям болуп къалмай, сабийлени энчи дуниясыды, экинчи  юйлериди. Алай эсе уа, биз, устазла, анга аланы жюреклери тартырча этерге  борчлубуз. Ол жаны бла къолубуздан келгенни да аямайбыз»,– дейди директор. 
Бусагъатда мында  234 жаш бла къыз окъуйдула. Аны кесини сабий сады да барды. Мектепге кёп  миллетлени келечилери жюрюгенлерин да белгилерчады. Аланы асламысы  саулукъларына  мында бакъдырадыла.
Тау элни мектебинде былтыр хар не кереги бла да тынгылы жалчытылгъан  «Точка роста»  илму-гуманитар ара ачылгъанды. Ары сабийле бютюн  сюйюп жюрюйдюле, физикадан, химиядан, биологиядан, дагъыда башха предметледен къошакъ билим аладыла.
Бу кюнледе окъуучуланы иги кесеги ауруп, школгъа жюрюмейдиле. 9-чу - 11-чи класслада билим алгъан жашла бла къызла дерследе олтура эдиле. «Саусуз сабийлени  онгларына кёре узакъдан окъутабыз»,– деп ангылатады Абидат Ахматовна.
Мында да жетишедиле. Анга да къарамай, директор  жаш адамла ишлерге келселе ыразы болгъанын айтады. «Элден университетни педагогика бёлюмюне кирип, билим алгъан жашла, къызла да бардыла, алай ала шахарда, анга  жууукъ элледе тохтаргъа сюедиле. Аланы ангыларгъа да боллукъду: жаш адамланы сурамлары башха тюрлюдю. Битеу ол затлагъа да къарамай, таукел айтыргъа боллукъма, бизни мектеп не жаны бла да кёп башхаладан иги тюйюл эсе, аман а тюйюлдю. Кесибизни ашханабыз барды. Анда башланнган классланы окъуучулары хакъсыз ауузланадыла. Саусузлагъа бла сакъатлыкълары болгъанлагъа  энчи къаралады. Район администрациябызны тирилигини хайырындан бизде сабийлени ашатыу федерал бюджетде белгиленнген даражагъа  жетдирилгенди. 5-чи – 11-чи классланы окъуучулары уа ата-аналары бла этилген келишимге тийишлиликде,   ай сайын 850 сом тёлейдиле эмда жылы  аш-суу бла    жалчытылынадыла»,– дейди директор.
Келе тургъан жылны март айында уа мектеп федерал программагъа тийишлиликде, толусунлай  тынгылы ремонтха жабыллыкъды. Анга деп  55 миллион сом бёлюннгенди. Ол ахчагъа мекямны башы, терезелери, эшиклери, поллары, къысха айтханда,  къабыргъаларындан къалгъан хар неси да  алышындырыллыкъдыла. 

Холаланы Марзият

Поделиться:

ЧИТАТЬ ТАКЖЕ:

28.03.2024 - 10:01

НИЕТ ХАЗНАБЫЗНЫ АЙНЫТХАНЛА

Халкъыбызны ниет жетишимин кёргюзтген Къулийланы Къайсын атлы Малкъар театрны къуралыуу озгъан ёмюрню 1930-чу жылларында башланнганды. 1935 жылда А.

28.03.2024 - 09:03

ГИТЧЕ ЭМДА ОРТА БИЗНЕСНИ МАГЪАНАСЫ УЛЛУДУ

Къайсы къыралда неда аны ичинде субъектде экономиканы айнытыугъа уллу къошумчулукъ этгенле гитче эмда орта бизнес бла кюрешгенледиле эмда энчи предпринимательледиле.

28.03.2024 - 09:03

ИНВЕСТИЦИЯЛАГЪА – ЭНЧИ ЭС

Жангы предприятияла къурарча, производствону кенгертирча, инвестицияла этмей, башхача айтханда ишге ахча салмай боллукъ тюйюлдю.

27.03.2024 - 14:04

КЪАБАРТЫ-МАЛКЪАР РЕСПУБЛИКАНЫ БАШЧЫСЫ К.В.КОКОВНУ РОССЕЙ ФЕДЕРАЦИЯНЫ МИЛЛЕТ ГВАРДИЯСЫНЫ АСКЕРЛЕРИНИ КЮНЮ БЛА АЛГЪЫШЛАУУ

Росгвардияны Къабарты-Малкъар Республикада Управлениясыны хурметли аскерчилери, ишчилери эмда ветеранлары! Сизни Россей Федерацияны Миллет гвардиясыны аскерлерини кюню бла алгъышлайма!

27.03.2024 - 09:07

САКЪАТ САБИЙЛЕ ОКЪУУСУЗ КЪАЛМАЗЧА

Къабарты-Малкъарны Жамауат палатасында республиканы билим бериу учреждениялада сакъат эм къыйын ауругъан сабийлени окъутуу не халда болгъаны тинтилгенди.