Жангы жылгъы байрамланы аллында КъМР-ни Парламентини башчысы Татьяна Егорова фашист концлагерьни жесири, Уллу Ата журт урушну ветераны Анатолий Юрковну юй бийчеси Александра Васильевнаны жокълагъанды.
Сыйлы ынна къонакълагъа жарыкъ тюбегенди, анга былай эс бурулгъаны, намыс берилгени ючюн ыразылыгъын айтханды. Ушакъны кезиуюнде Татьяна Егорова къаллай кемчиликле, жетишмеген затла болгъанларын сурагъанды, аланы тамамларгъа болушургъа айтханды.
Парламентни башчысы Александра Васильевнагъа саугъала бергенди эмда саулукъ, узакъ ёмюр тежегенди.
Тюбешиуню юсюнден журналистлеге айта, Татьяна Борисовна Парламентни депутатлары Уллу Ата журт урушну ветеранларына болушлукъну дайым да этгенлерин чертгенди.
– Жарсыугъа, ветеранла аздан-аз болуп барадыла. Мен таныгъан, болушхан кёпле дунияларын алышхандыла. Болсада аланы жарыкъ сыфатлары эсимде къалгъанды. Бюгюн а Александра Юрковагъа келалгъаныма артыкъда ыразыма. Эркинликни, жалынчакъсызлыкъны къоруулагъан, фашистлени ууатхан жигитлерибизни атларын эсибизде жюрютюп, аланы хурметлерин кёрюрге борчлубуз. Шёндюгю тёлю уа аланы ышаныулукъларына кертичи болуп, къыралыбызны сейирлерин, халкъларыбызны ниет хазнасын сакъларгъа керекди. Ол бек магъаналыды,-дегенди Татьяна Егорова.
КъМР-ни Парламентини пресс-службасы.