Кёп болмай «Милосердие 07» жандауурлукъ фонд Жангы жылны  байрамына жоралап саулукълары бла байламлы чекленнген онглары болгъан эм къарыусуз юйюрледен сабийлеге саугъала берирча тёрели акцияны  бардыргъанды.  

Бу жол байрамгъа ата-аналары бла  алтмыш сабий, Нальчикни 27-чи номерли орта школуну волонтёр къаууму, Сабий эм жаш тёлю  чыгъармачылыкъ къаланы эм «Улицы России» битеуроссей жамауат  организацияны  келечилери да къатышхандыла.  Анга келген  Къарт Аппа бла Къар къыз,  Зимушка-Зима эм Эльдар  Дымовну жаш артистлери бютюн да къууанч эм асылыукъ  къошхандыла. 

Омакъ назы терекни сабийле волонтёрла бла бирге жасагъандыла. Программагъа кёре, конкурсла, оюнла бардыргъандыла, жыр айтып, тепсеп, зауукълукъ тапхандыла.  Жандауурлукъ фондну таматасы  Олег Кузьминов айтханыча, быллай акцияланы хайыры бла сакъат сабийле  тыш адамла бла байламлыкъ жюрютюрге юйренедиле эм жамауатны арасында да  инклюзив культура айнырча себеплик болады.

Байрамны къурагъанладан бири, 27-чи номерли  школдан  класс тамата  Элеонора Таова окъуучуланы акциягъа къатышханлары, аланы  адамлыкъ жаны бла даражаларын кёргюзтгенин  белгилегенди. «Бусагъатда сабийлени  бирсилеге жарсый билирча, ариу кёзден къарарча юйретирге керекди. Жандауурлукъ акциялагъа къатышханла  жашаугъа башха кёзден къарайдыла, сынамларын ёсдюредиле эм жашауну иги этерге итинедиле», деп къошъанды ол.   

Къабарты-Малкъарны  депутат корпусуну бетинден  Борис Паштов да сабийлени Жангы жыл бла алгъышлагъанды.

- Бюгюнлюкде саулукълары бла байламлы чекленнген онглары болгъанлагъа болушурча  власть уллу иш бардырады.  Кертиси бла, хар сабийге жетиширге онг табылмай эсе да, мындан арысында да  аланы болумларын игилендирирча законланы къабыл этерикбиз. Биз сизни бек сюебиз, ол себепден келир жылда бар игилик тежейме,- дегенди Борис Султанович.

Ол кюн сабийлеге татлы ашарыкъла берип къууандыргъандыла. Аны бла бирге байрамгъа келалмагъан энчи категориялы сабийлеге да эс бурулмай къалмагъанды. 

Магометланы Сулейман.