«Иш кёллю Россей» жамауат организацияны Къабарты-Малкъарда бёлюмюню Жаш тёлю бизнес-школун тауусханла бу кюнледе бизнес-проектлерин къоруулагъандыла. Аны бла байламлы Жамауат палатаны конференц-залында жыйылыу ётгенди.
Жюриге бёлюмню башчысыны орунбасары Гузеланы Индира, Монополиялагъа къажау федерал службаны КъМР-де управлениясыны таматасы Казбек Пшиншев, «КъМР-ни айнытыу корпорацияны» инвестицияла бёлюмюню башчысы Марина Теунова, КъМКъАУ-ну «Экономика» кафедрасыны доценти Зумакъулланы Фатимат, «Маяк» санаторийни эмда «УДЦ «Кватро» ООО-ну башчылары Мамайланы Галина бла Жаболаны Инна киргендиле. Проектлеге багъа бергенлени санында уа бу предпринимательле бар эдиле: Амир Юсубов («Cook & Talk» кулинария мастерской), Ляна Реан («Стрекоза» деген эстетика жаны бла айнытыу ара), Лейла Шинахова («Перспективгрупп» ООО) эм Марина Евгажукова (Жашырын хунерликлени Академиясы).
Сюзюуге битеу да сегиз проект кёргюзтюлген эди. Ол санда ресторан эмда кафе ачыу, сабий чыгъармачылыкъ ара, макъам-философия студия эмда ювелирный мастерской къурау, кир-кипчикни жарашдырыу, электрон устройство чыгъарыу бла байламлы. Жаш адамла сайлагъан сфераларында болумну, конкуренцияны, маркетингни, ишни энчиликлерин да терен билгенлерин кёргюзтгендиле. Айтханларына кёре, проектни къурардан алгъа ишден хайыр чыгъарлыгъын бла къаллыгъын да тинтгендиле. Бизнес-школда уа алагъа не жаны бла да билеклик этгенлей тургъандыла.
Болсада сынамлы коллегаларыны насийхат сёзлерине да табылгъанды жер. Казбек Пшиншев асламысында бизнес-проектлени закон бла байламлы энчиликлерине эс бургъанды: иш тохташдырылгъан излемлеге, жорукълагъа да келиширча сакъ болургъа, дагъыда рынокда конкуренцияны, хайырланыучуланы оюмларын да теренирек тинтирге чакъыргъанды.
- Шёндюгю дунияда, сёз ючюн, кафе ачхандан артыкъ хайыр боллукъ тюйюлдю. Бек уллу конкуренция барды, ол себепден адам сизни ашханагъа келирча аны бир энчилиги болургъа керекди. Башхача айтханда, мында жаланда татымлы аш этиу бла къаллыкъ тюйюлсюз, - деп белгилегенди ол.
Алай бла жюрини келечилери хар проектни юсюнден билдиргендиле оюмларын. Аланы жарашдыргъанлагъа эм биринчиден этиллик инвестицияланы ёлчемин эмда ала къайтарыллыкъ болжалны жик-жиги бла тергерге кереклисин белгилегендиле. Ызы бла бизнес къаллай хайыр келтирлигин, энчи предпринимательство – ол хар кюнлюк, хар сагъатлыкъ иш болгъанын да толу ангыларгъа чакъыргъандыла.
Къалай-алай болса да, жаш адамланы итиниулюклерине эмда проектлени жарашдыргъанда салгъан къыйынларына бийик багъа берилгенди. Бегирек да «Mila Mol» деген ювелирный мастерской ачаргъа сюйген Милана Чегемованы эмда кир-кипчик жарашдырыучу завод ишлерге сюйген Шахрижан Шахмурзаеваны бла Владимир Стукаловну башламчылыкъларына.
Проектлерин къоруулагъанлагъа бизнес-школну тауусханларына эмда тийишли курслада окъугъанларына шагъатлыкъ этген дипломла бла сертификатла бергендиле ахырында.
