Связь бла жалчытхан операторланы арасында биринчи болуп, МегаФон компания Чирик кёллени тийрелеринде LTE мобильный сеть къурагъанды. Алай бла энди ол тийреледе солуу базалада, кёллени тёгереклеринде да терк ишлеген интернет барды, деп билдиргендиле КъМР-ни Цифралы айнытыу министерствосундан.

Огъары эмда Тёбен чирик кёллени къатларында мобильный интернет 35 Мбит терклик бла ишлейди. Сотовый телефон бла сёлешеме дегенлеге уа аны VoLTE технология бла жалчытадыла. Ол адамны ауазын бек таза, шатык эшитдиреди.

«Чирик кёлле бизни республиканы эм ариу жерлеринден биридиле. Жыл сайын алагъа къадар турист келеди. Энди уа къонакълагъа терк ишлеген интернет да барды алайда. Адамла суратларын социал сетьлеге неда мессенджерлеге терк ашырыргъа боллукъдула, сюйселе уа видеогъа чыгъып, тюзюнлей эфир да бардырыргъа», дегенди МегаФонну Къабарты-Малкъарда бёлюмюню башчысы Роман Терехин.

Быйыл компания быллай сеть бла бизни республикада кёп жерлени жалчытып башлагъанды. LTE Нальчикде аэропортну къатында, Чегетде, Минги тауну тийрелеринде да ишлейди. Аны аллай связь берген станцияларындан бири 3890 метрде орналады. Не Россейде, не саулай Европада аллай бийикликде сотовый станция жокъду андан сора.

Улбашланы Мурат хазырлагъанды.