Черек районда сабий майданла, бассейнле бла кемпингле ачыллыкъдыла. Республиканы Курортла эм туризм министерствосуну келечилери «Туризм эм къонакъбайлыкъны индустриясы» миллет проектге грант болушлукъ этиуню чегинде къурулушлары баргъан объектлеге къарагъандыла.

Эки сабий майдан, жылны узуну ишлеген бассейн бла къонакъ юйле Тёбен Чирик кёлню тийресинде орналлыкъдыла. Тёрт юйчюкден къуралгъан кемпинг къонакъланы Огъары Малкъарда сакъларыкъды. Ала эм башха объектле жууукъ заманда Черек районну турист инфраструктурасын байыкъландырлыкъдыла.

Министерствону къырал программала эм инвестиция прооектле жаны бла управлениясыны башчысы Мадина Налоева айтханыча, солуу сфераны айнытыу иш саулай да республикада тамамланады. Проектлени толтуруу болжалла къысхадыла, алай бизнес бу борчха жууаплы кёзден къарагъанды, аланы бузмазгъа кюрешеди, бюгюнлюкде ачылгъан жангы объектле бардыла. Энчи эс сакъат адамлагъа да тынчлыкълы онгла къураугъа бёлюнеди. Грант программагъа къатышхан Кюйгенланы Борис белгилегенича, проектлени жарашдыргъанда къонакъла мында чурумсуз, чырмаусуз турурларына къаралады. «Юйчюкле алада солугъанла, тёгерекде табийгъатха къарай, аны ариулугъун кёре, ырахатлыкъ табарча ишленнгендиле. Бери инсан солургъа юйюрю неда шуёхлары бла келирге боллукъду, битеу да 20 адамны сыйындырыргъа жарарыкъды», – дегенди ол.

Быйыл Россейни Правительствосу Къабарты-Малкъаргъа туризм проектлени тамамлаугъа грант болушлукъ халда 250 миллион сом ётдюргенди. Субсидияла 59 заявкагъа берилгендиле, аладан жетиси - турист инфраструктураны айнытыу жаны бла жамауат башламчылыкъланы бардырыргъадыла, онтогъузу – кемпинглени бла автокемпинглени ишлергедиле, отуз ючюсю да туризм инфраструктураны айнытыугъа къыралны жанындан болушлукъ бла байламлыдыла.

Кульчаланы Зульфия.