Белгилисича, устаз   къыйын аны бла бирге даражалы усталыкъладан бирине саналады. Гитче класслада ишлер ючюн а, артыкъ тёзюмлюк керекди.  Алагъа, дерсле бергенден тышында да, психологну, юйретиучюню,  бирде уа ата-ананы  орунуна болургъа да тюшеди.  Сабий школда андан ары  къалай окъуругъу эм жашаугъа къарамы биринчи устаз салгъан   мурдоргъа кёре къуралады.  
Мырзаланы Наталья да бу къыйын жолну сайлагъанладан бириди.  Ол Тырныаууз шахарны 1-чи номерли лицейинде ишлейди. Алгъаракълада бардырылгъан  «Учитель года-2019» Битеуроссей конкурсну  муниципал эм республикалы кесеклеринде  хорлагъанды.   Ол бизни ушакъ нёгерибизди.

- Урунуу жолунгу уа къайда башлагъанса? 
- Армавирни лингвистика университетини филология бёлюмюн къызыл дипломгъа бошагъанма. Ызы бла   сабий садда юйретиучю болгъанма.  Кертисин айтханда, воспитательни ишини юсюнден хапарым болмагъаны ючюн тамата коллегаларымдан хар неге  юйренирге  кюрешгенме. 
Андан сора да,  ингир сайын школгъа дери сабийлеге билим бериу  методикаланы тинтгенме. Букъдурмай айтсам, алгъа бек къыйналгъанма, ишим иги бармай, жарсыгъан кезиулерим да болгъандыла.  
Бираздан саулай ишиме берилгеними сеземе. Хар баланы къылыгъыны  энчилигин  ойлап,   аны бла бирге сынамымы да ёсдюрюп тургъанма.  
- Баям, биринчи окъуучуларынг эсингде  болурла? 
- Хау. Заман баргъаны бла аланы  ёсгенлерин да эслемегенме. Аны толусунлай  бир бирден айырылыргъа тюшгенде ангылайса.  Аланы алда школ сакълай эди, мени уа  -  жангы къауум. Жылла бла ол болумгъа юйрене бараса. 
- Айтханыгъызгъа кёре,  сиз мектепде ишлерге уллу сынамыгъыз бла келгенсиз?
- Биринчи 2012 жылда ёз школумда  гитче класслада устаз болуп ишлеп башлагъанма. Аланы сабий саддагъыладан артыкъ башхалыкълары жокъ эди. Ол себепден мен аланы иги ангылагъанма,  къалай  хазырланып келгенлерин да билгенме. 1 сентябрьде, биринчи окъуучуларымы ала туруп, кюн сайын къыйналыргъа тюшеригин эм  манга къаллай уллу борч салыннганын да сезген эдим. 
-  Окъуучуларыгъыз  билим бериу жолну тынчыракъ ётерча къаллай амалланы хайырланасыз? 
- Мында жалан устазны  билими эмда сынамы  бла чекленип къалыргъа жарарыкъ тюйюлдю. Хар окъуучугъа энчи кёзден къараргъа, аланы ангыларгъа  юйренирге керекди. Аны бла байламлы  жангы методикала бла шагъырейленеме, къошакъ билим алама, ишимде чыгъармачылыкъны да тири хайырланама. 
Эм биринчиден, адам тутхан ишинден къууаныргъа керекди.  Сёз ючюн, окъуучуларымы  дефтерлерине  къарагъан кезиуюмде окъуна   хар тюз жазылгъан жууапха къууанама. Ала конкурслада, олимпиадалада хорласала уа,  ёхтемлигими чеги болмайды.  Ол заманда усталыгъымы бошуна сайламагъанымы сеземе.
- «Устаз» деген сёз  сизге не магъананы жюрютеди?     
- Устаз -  ол уллу даражаладан бириди. Жашауун анга жоралагъан адам насыплыды. Къайсы бир педагог да къыйыны керексизге кетмегенине, окъуучуларыны жюреклеринде  къаллыгъына эмда ала унутмай эсгере турлукъларына бек ышанады. Мен бу усталыкъны сайлагъаныма бир заманда да сокъуранмагъанма, сабийге билим бергенден, юйретгенден магъаналы иш жокъду, деп алай сунама. 
- Бош заманыгъызны къалай ётдюрюрге сюйюучюсюз ? 
- Кертисин айтханда, бош заманым болмайды дерчады. Мени юч сабийим барды да,  ишден тышында саулай алагъа берилеме. Алай, солургъа онг табылса,  аш этерге сюеме, юйдегилерими, къонакъланы да  татлы азыкъла хазырлап сыйлаучума.  
- Ишигизде эм башламчылыкъларыгъызда  тутхучлукъ этгенле бармыдыла ?  
- Эм уллу болушлугъум эмда таянчагъым ол мени атам, анам, юйюрюм эм  коллегаларымдыла.  Усталыкъ сайлау жаны бла насыбым тутханды дерге боллукъма. Мен окъуучуларымы сюйгенча, ала да манга алай игидиле.  Ала жетишимле болдурсала уа, манга андан уллу саугъа жокъду.