«Кавказ» жолда Чегем эм Лескен суулада кёпюрге, сора дагъыда «Эльбрус» курорт таба баргъан А-158 трассада аллай бир объектге быйыл тынгылы ремонт этилгенди. Ала бла бирге Чегем шахарда трассаны бирси жанына жер тюбю бла элтген переход жангыртылгъанды, жылны ахырына дери уа Хеу сууну Аушигерни къатында кесегинде кёпюрде ишле да тамам этилликдиле, деп билдиргендиле жоллагъа къарагъан «Кавказ» Управлениядан.

Бу ишлени хайырындан жол объектле бар излемлеге келиширча болгъандыла. Сёз ючюн, Чегемдеги кёпюрню эни алгъын 9,5 метр болуучу эсе, энди ол 11,5 метрди. Лескенде кёпюр а бир угъай, эки ызлы болгъанды. Къуба-Табада быллай объектни да жолчула тёрт ызлы этгендиле. Ары дери ол эки кереге тар эди. Элбрус элни къатында кёпюр да кенгирек болгъанды; сегиз угъай, онюч метрди энди.

Алай бла бир жылны ичинде специалистле къадар иш этгендиле: эски объектлени оюп кетергендиле, мурдорларын жарашдыргъандыла, жоллагъа къошулгъан жерлерин кючлендиргендиле, суу ашамазча мадар да этгендиле. Ызы бла эки къат асфальт жайгъандыла. Аны бошагъандан сора, ток тартып, чыракъла орнатхандыла, жол белгилени да жарашдыргъандыла. Асфальтны юсюнде ызланы уа термопластикден этгендиле. Специалистле айтханларыча, ол ашалмай иги кесек заманны сакъланнган материалды. Жаяу жюрюгенлеге деп тынгылы тротуарла ишлегендиле, тёгереклерин да буруула бла бегитгендиле.   

Жангыртыу ишле аны бла чекленип къаллыкъ тюйюлдюле. Жолчула шёндю «Кавказ» трассаны битеу да 23-километрлик кесегине ремонт эте турадыла. Ол санда Ставрополь край бла чекден башлап, Къоба-Таба элге дери участкасы тёрт ызгъа дери кенгертиле турады. Аргудандан башлап, Шимал Осетияны чегине дери кесеги да ол халли боллукъду. Дагъыда Огъары Бахсанны къатында, Адыр-Сууда эмда Эски Черекни къатында Черек сууда кёпюрлеге тынгылы ремонт эте турадыла.

Жоллагъа къарауну чеклеринде Управленияны келечилери сегиз километрден артыкъ буруула, тёрт километр чакълы парапет тыйгъычла, беш светофор орнатхандыла эмда башха ишле тындыргъандыла.

Аны бла бирге кезиулю жумушларын да унутмагъандыла. Шёндю, къыш сууукъла башланнганлары бла, жоллагъа жаярча 17 тонна зыгъыр бла туз къатыш хазырлагъандыла. Хайырланыуда болгъан энчи техниканы саны уа жарым жюзден атлагъанды.

Улбашланы Мурат хазырлагъанды.