КъМР-де ич ишлени министр «Мени ата-анам полицияда ишлейди» деген конкурсну лауреатларын алгъышлагъанды. КъМР-де ич ишле министр полицияны генерал-лейтенанты Василий Павлов эм министерствода жамауат советни таматасы  Рулан Макушев сабийлеге саугъала бла ыспас къагъытла бергендиле.  

Ведомствону башчысы, сабийлени алгъышлап, быллай ахшы конкурсха тири къатышханларына уллу магъана бергенди. Ызындан быйыл ётген башха битеуроссей эришиуледе юч сабий алчы жерлеге чыкъгъанларын белгилегенди. Алай бла Москвада «Полициячы Дядя Стёпа» конкурсда Бёзюланы Малик хорлагъанды. Милена Абрегова ишлеген сурат а  12-14 жыл сан къауумда биринчи жерге тийишли болгъанды. Ючюнчю жерни уа 6-8 жыл сан къауумда Виктор Глакомгъа бергендиле.

- Кеслерини суратларында сабийле полициячыланы тышында эм кеслерини юйлеринде къалай кёргенлерин билдиргендиле. Сау болугъуз сабийле! Ишлеригизге къарагъандан сора фахмулулугъузгъа  бек сейирсиннгенбиз, сиз аны толусунлай ачыкълагъансыз, - деп чертгенди министр.

Василий Павлов а энчи ыразылыгъын сабийлени ата-аналарына билдиргенди.   «Ишибизни къыйын низамына къарамай, сиз сабийлеригизге адам шартланы сингдирирге къарыу да, заман да табасыз, аланы урунуугъа бла чыгъармачылыкъгъа, жашауну тюз ангыларгъа юйретесиз», - деп чертгенди ол.

Ата-анала да балаларына фахмуларын кёргюзтюрге быллай онгла бергенлери ючюн  министерствону башчыларына уллу ыспас этгендиле, деп билдиредиле КъМР-де МВД-ны пресс службасындан

Холамханланы Алима.