Бу кюнледе Къытайны Шанхай шахарында ашарыкъ  продукцияны чыгъарыуда хайырланылгъан энчи оборудованияланы SIAL China 2019 деген XX-чы халкъла аралы кёрмючю бардырылгъанды. Бизни республикадан да анга талай предприятие къатышханды. Алагъа ары барыргъа Къабарты-Малкъарны Предпринимательствогъа себеплик этиу арасыны экспортха билеклик этген бёлюмю болушханды, деп билдиргендиле Экономиканы айнытыу министерствосундан.
SIAL China саулай Азияда, аны къой,  жер башында окъуна аш-азыкъ продукция жаны бла эм уллу кёрмючледен бирине саналады, жыл сайын Шанхайда ётеди, оптовый эмда розница сатыу-алыу, татлы суула эмда ашарыкъ затла  чыгъарыу, жумушла бла  жалчытыу, къонакъ юйлени ишлерин бардырыу бла кюрешгенлени жыяды. Быйыл анга 112 минг чакълы  специалист къатышханды.
Къабарты-Малкъардан а ары сагъынылгъан  Араны башчысыны орунбасары Беслан Каншаов, «ЭЛЬБРУС-К» кондитер фабриканы, «Живая вода» эмда «НАЛЬТЕКС» предприятияланы келечилери  баргъандыла. Министерствода айтханларына кёре, аны хайыры бла ала кеслерини экспорт онгларын кёргюзтюрге, башха къыралладан алыучула эмда партнёрла табаргъа боллукъдула.