КъМР-ни Башчысы Казбек Коков Сабийлени бла жаш адамланы россейли къымылдаууну биринчи съездине барлыкъла эмда «Россей - онгланы къыралы» платформаны конкурсларында бла проектлеринде хорлагъан жашла эм къызла бла тюбешгенди.

Сабийлени бла жаш адамланы россейли къымылдауу РФ-ни Президенти Владимир Путинни башламчылыгъы бла къуралгъанын айтырчады, ол жаны бла Указгъа ол 2022 жылда июльда къол салгъанды. Аны биринчи съезди уа Москвада 17-21 декабрьде «Манежде» бардырыллыкъды. Къабарты-Малкъардан  ары 32 жаш адам барлыкъды.

Тюрлениуню кезиуюнде белгили болгъаныча уа, съездге Казбек Коков да чакъырылгъанды. Жаш адамланы бла аланы устазларын алгъышлай, Казбек Валерьевич аланы аталарына бла аналарына фахмулу, тири, адепли сабийле ёсдюргенлери ючюн ыразылыгъын айтханды. - Къыралны оноучусу, власть органла жаш адамланы фахмуларын ачыкъларгъа, кеслерине жашауда тийишли жер табаргъа, сынау жыйышдырыргъа тийишли онгла къурайдыла. Сизни жетишимлеригиз  анга шагъатлыкъ этедиле», - дегенди ол.

Республиканы оноучусу залда жыйылгъан жашла бла къызла тарых магъаналы жумушну башламчылары болгъанларын чертгенди. «Совет къырал чачылгъандан сора къыралда жаш тёлю политика жаны бла иш тийишлисича бардырылмагъанды. Бюгюн а алгъыннгы иги тёреле жангыртыладыла, бийик даражада толтуруладыла. Бу къымылдауну алгъа элтирикле уа сизсиз»,-деп къошханды КъМР-ни Башчысы.

 Сабийлени бла жаш адамланы россейли къымылдаууну регионда бёлюмюню башчысы Аслан Шипшев бу организация не мурат бла къуралгъанын, аны борчларын да туура этгенди. «Ол сабийлени бла жаш адамланы сейирлери жаны бла къырал политиканы жашауда бардырыргъа себеплик этерикди. Борчларыны арасында уа ёсюп келген тёлюню усталыкъны сайларгъа, ала   жашауда кеслерине тийишли жер табарча онгла къураргъа эм башха жумушла бардыла»,-дегенди ол.

Съездни юсюнден айта, жаш адамла он бёлюмге юлешинип ишлериклерин билдиргенди Аслан Шипшев. Бизни республикадан делегатла алагъа барысына да къатышадыла. «Программа байды, биз анда иги сынау жыйышдырып, жетишимли боллугъубузгъа ишексизме. Тюнене уа КъМКъУ-да школчула бла бирге делегатла съездге кеслерини оюмларын хазырлагъандыла»,-деп билдиргенди ол.

Ызы бла жаш адамла сёлешгендиле. Ала къаллай бёлюмлеге къатышырыкъларын,  къаллай эсгертиуле, оюмла хазырлагъанларын билдиргендиле. Сёз ючюн,  Нальчикни 4-чю номерли гимназиясыны 11-чи классыны окъуучусу  Дамир Мезов «Тыш къыраллы нёгерле эм партнёрла» бёлюмге къатышырыкъды. Ол кеси да дипломатия классда окъуйду. Тюбешиуде уа битеу билимин, сынауун хайырланып, дипломатча сабыр халда республиканы атын, башламчылыкъларын да къорууларыкъды. «Биз Элбрусда дипломатия кампус къураргъа деп, аллай башламчылыкъ этгенбиз. Сабийлени бла жаш адамланы россейли къымылдауу бла бирге ол къыралда, андан тышында да бирге ишлерге, нёгерли байламлыкъла къураргъа себеплик этерик эди»,-дегенди жаш дипломат.

Яникойну орта школунуу окъуучусу Шауаланы Арина уа «Медиа эм блогсфера» бёлюмде ишлерикди. Ол кеси да «Уллу перемена» проектни финалына чыкъгъанды. «Мени башламчылыгъым билим бериу портал къурап, аны болушлугъу бла  жаш адамланы интернетде къоркъуусузлукъгъа, анда билдириулени тюз юлеширге юйретиу  бла байламлыды. Шёндюгю тёлюню жашауу социал сетьле бла къаты байламлыды, хар кюн да анда артыкъда кёп информация алабыз. Алай аланы арасында терсни бла тюзню айыра билирге керекбиз»,-дегенди ол.

Тюбешиуню ахырында Казбек Коков жаш адамланы башламчылыкълары сейир болгъанларын белгилегенди. «Шёндюгю  къыралыбызгъа болумну, анга тюшген къоркъууланы ангыларгъа керекди. Россейли дипломатияны тёрелери уа терендиле, битеудуния даражада магъаналыдыла. Сизнича, билимли жаш адамла ол тёрелени андан ары бардырлыкъларына, къыралыбызны сейирлери сакъланырыкъларына, дунияда даражасын бийикде жюрютюрюклерине ышаныулукъ бередиле», - дегенди ол дипломатия жаны бла проектни юсюнден айта.

Республиканы оноучусу, устаззлагъа да ыразылыгъын билдиргенди. «Ёсюп келген тёлюге себеплик этиуню юсюнден айтханда, республикада энчи министерство къуралгъаны тюз оноу болгъанын энтта бир кере кёргенбиз. Алай   федерал арада къуралгъан онглагъа къатышхан бла бирге    республика кеси да башламчылыкъла этеригине ийнанама», - деп,  Казбек Валерьевич эмда Профсоюзланы къаласын жаш тёлюге берирге, министерствону, жаш тёлю организацияланы, Сабийлени бла жаш тёлюню россейли къымылдаууну  штабын да анда орнатыргъа белгиленнгенин билдиргенди.

- Дагъыда Жаш тёлюню къаласын да битдирликбиз. Анда уа жаш адамла тюбеширге, проектлерин жашауда бардырыргъа боллукъдула. – деп къошханды.

Казбек Коков  аслам эс элледе жаш адамлагъа буруллугъун  айтып, аланы мындан ары да тири болургъа чакъыргъанды. «Ёсюп келген тёлю бла бек ёхтемленеме. Сизге къарап, башха жашла бла къызла да жетишимлеге итинирикдиле, жамауатха, республикагъа, къыралгъа саулай да хайыр келтирирге кюреширикдиле. Бюгюн мында эшитгеним, кёргеним а мени да ишлерге кёллендиреди»,-дегенди Казбек Коков.

Тюбешиуню ахырында уа  фахмулу жаш жырчы «Битва талантов» телепроектге къатышхан  Заур Барагунов жыйылгъанланы сейир ауазы бла къууандыргъанды.

Тикаланы Фатима.