Сабийлени жангы тёлюлери ёсюп келгени, аланы излемлери тюрленнгени, информация технологияланы сингдириу – ала барысы да билим бериуню бийик даражагъа чыгъарыуну излейдиле. Аны бла байламлы бюгюнлюкде устазны баш борчларындан бири баланы шёндюгюлю болумлада кесини жерин табаргъа, алагъа тюзетирге юйретиудю. Тырныауузну В.Г. Кузнецовну атын жюрютген 6-чи номерли школуну къошакъ илим бериу жаны бла устазы, «Жюрегими сабийлеге береме» битеуроссей конкурсну «Профессионал дебют» номинациясыны муниципал кезиуюнде хорлагъан Улбашланы Махмут аны тынгылы толтурады.

 - Алтынчы школ мени ёз мектебимди, - дейди Махмут. – Орта билим алгъандан сора Х.М. Бербеков атлы Къабарты-Малкъар къырал университетге кирип, «Информатика и вычислительная техника» жаны бла билим алгъанма. Сабийлигинде бла жаш заманында хар кимни жюреги бир жанына тартады, алай абадан кезиуге адам аладан жанына эм жууугъун сайлайды. Мен не заманда да техника жангычылыкъланы жаратханма, университетде окъугъанымда квадрокоптерден видеогъа алдырыргъа сюйгенме. Пилотсуз учуу аппаратла бюгюнлюкде асламдыла, кеслери да жангыз съёмканы бардырыуда хайырланылмайдыла. Алай бла Россейде тамблагъы кюнню усталыкъларына юйретиу сейир тюйюлдю. Мен да аллай онгну ычхындырмагъанма, нек дегенде школубузда цифра эм гуманитар профильли «Точка роста» ара ачылгъанды. Бошала тургъан окъуу жылда сабийлени «Пилотсуз учуу аппаратла» къошакъ программагъа кёре окъутханма, ала моделирование бла конструированиягъа, этгенлери бла хайырланыргъа юйреннгендиле.

Махмутну чыгъармачылыкъ биригиуюне кадет классланы окъуучулары да жюрюйдюле. Ол да, окъуучуларына жюрек жылыуун бере, хар жангы келген тёлюню айныууна къошумчулугъун этеди, аланы жетишимли болурларына къайгъырады. «Сабийлени жылтырагъан кёзчюклерин кёрсем, бу усталыкъгъа бошдан келмегеними ангылайма, битеу билгеними алагъа юйретирге кюрешеме. Бийик технологиялагъа, энди ачыкъ бола тургъан затлагъа кесим да дайым итиннгеним сабийлеге жангы онгла ачады», - дейди.

Педагогга техникагъа сейирлери болгъан сабийле келедиле.Аны программасыны мураты – алагъа гитчеликден усталыкъ сайларгъа болушууду. Сабийлеге бюгюн бергенинг, тамблагъы кюнюбюзню мурдору болгъанына Махмут ишексизди. Къыралыбызны эндиги инженерлерин хазырлаугъа къыйын салгъаны аны ёхтемлендиреди. Устазны оюмуна кёре, окъуучуланы айныулары педагогну усталыгъына кёре боладыла. Аны ючюн кеси да дайым юйреннгенлей, тюрлю-тюрлю муниципал, регион семинарлагъа къатышханлай турады.

- Ёз школумда уруннганыма насыбым тутханды, мени окъутхан устазла бюгюн ишчи нёгерлеримдиле, керек кезиуде болушургъа хазырдыла, - дейди Улбаш улу. – Коллективибизде хар бирибизни да оюмуна тынгылай юйреннгенбиз. Арада байламлыкъла биригип ишлеуню, бир бирге хурмет, билеклик этиуню мурдорунда къуралгъандыла. Устаз жетишимли, хар не жаны бла да билимли, башламчылыкълагъа бай болургъа тийишлиди. Ол заманда аны намысы жюрюрюкдю, сабийлеге юлгю боллукъду.

Махмут тири солууну сайлайды, сноубордда учаргъа сюеди. Ол айтханыча, сноуборд спортну къыш тюрлюлерини эм зауукълуларындан бириди, харкюнлюк ишледен солургъа болушады. Акъыл ишден къарыу излеген жумушха кёчюу, жангы кюч бере, бютюн уллу бийикликлеге итиндиреди, жангы оюмла туудурады. Таудан учуп келгенин видеогъа да алдырады – ол а усталыгъында да себеплик болады. Махмут белгили физик-теоретик Л. Д. Ландауну: «Эм башы, хар нени да итиниулюк бла этигиз! Ол жашауну чексиз ариу этеди», - деген сёзлерин тюзге санайды.

Кульчаланы Зульфия хазырлагъанды.