КъМР-ни Табийгъат байлыкъла эмда экология министерствосундан билдиргенлерича, Жангы жылны аллында республикада кийик табийгъатда ёсген назы терекчиклени эркинликсиз кесген  аманлыкъчыладан  сакъларча къаты контроль этилликди.  Аны къырал агъач инспекторла бла агъач мюлклени келечилери  бардырлыкъдыла. 

Жангы жылгъа дери ала участокларында дайым болумну тинтгенлей, агъач законодательствону  жорукъларына кёре ишлерин  тамамларыкъдыла. Ол санда  профилактика халда  эркинликсиз тереклени кесерге жарамагъанын жамауатха ангылатырыкъдыла. Бу ишге республикалы эм район аралы аслам информация органла да къошуллукъдула. 

Агъачда терекни кесген адам  салгъан къоранчына  кёре административ неда уголовный жууапха тартылады.  Анга кёре  инсан 3-4 минг сом берип  къутулалса да, организацияны келечисине 200-300 минг сом тазир тёлерге тюшерикди. Алай беш мингден артыкъгъа агъачха заран жетдирилген эсе уа, законодательствогъа тийишлиликде аманлыкъчыгъа  уголовный иш ачыллыкъды  эм ол  тутмакъгъа тутулургъа окъуна боллукъду

Бизни корр.