Арт кезиуде Къабарты-Малкъарны   эл мюлк товар чыгъарыучула жерчиликге аслам эс буруп тебирегендиле. Аны баш сылтауларындан бири  минерал семиртгичле бла химия кереклени багъаларына  кётюрюлгениди. Андан  сора да,  экология жаны бла тазалыкъгъа  да уллу магъана бериледи.     

Органиканы  баш шартларындан бири битимлени къурт-къумурсхадан эм аурууладан  биология амал бла къоруулагъаныды. Бу жаны бла микроорганизмлени штаммларыны мурдорунда жарашдырылгъан  биопрепаратла ахшы себеплик этедиле.   Аланы аслам  хайырланыу  экология жаны бла таза продуктлагъа сурам ёсе баргъаны бла байламлыды. 

Россельхозцентрни  Къабарты-Малкъарда бёлюмю битимлени грибок аурууладан къорууларча, микроэлементле бла жалчытырча эм ёсюмлерине кюч къошарча   биология препарат чыгъаргъанлы талай жыл болады. Экология биопрепаратны  къурамына  фунгицид эм ёсюмлерине кюч къошхан элементле киредиле.Ол санда Псевдобактерин-2 препаратны  республиканы аграрчыларындан тышында, къоншу регионладан алыргъа сюйгенле кёпдюле. Анга бактерияла, антибиотикле эм ёсюмню кючлеген  регуляторла киредиле. Алай бла фунгицид бла ёсюм къошхан элементле тирликни 20-25 процентге айнытыргъа болушадыла.

Кёп жылланы ичинде алыннган сынамгъа  кёре, Псевдобактерин-2 химиялы  фунгицидлеге бир зат бла оздурмайды эм аладан жетишимлиди окъуна  дерчады. 

Псевдобактерин-2 препарат комплексли аурууладан сакълайды. Ол санда мирзеулюклени гельминтоспориоздан бла фузариозну бар тюрлюсюнден эм башха хаталы аурууладан. Бирси микробиоагентлеча,  псевдобактерин онсегиз градус жылыда эм хауа мылыракъ  кезиуде  салынады.
Псевдобактеринни урлукъну къургъакълай   эки кюн алгъа къатышдырып хазырларгъа  керекди. Тахта кёгетлени   урлукъларын  а жерге салгъанчы суу растворда эм азындан сагъат жарым тутса игиди. Башха битимлеге  да  препаратны  чагалар заман жетсе чачдырадыла. Ол  теплицалада битимлеге да жарайды.

Бусагъатда алыучула мирзеулюклеге бла тахта кёгетлеге химия препаратла азыракъ салынсала сюедиле. Ол себепден бу жаны бла экология амалла ахшы себеплик этедиле. Дагъыда багъалы химия препаратланы азайтыу уллу къоранчладан да сакълайды. Саулай алып айтханда, таза продуктланы хайырланыу  жамауатны саулугъуна заран жетдирмезден сакълайды.

Магометланы Сулейман.