Жангы жыл жууукълаша келгени бла тюкенледе эм базарлада  назы терекчиклени сатып башлагъандыла.  Ол байрамны баш шартларындан  бири болгъаны  себепли,  аны хар юйюрде да жасаргъа итинедиле. Алай назыны кертисими, огъесе жалгъанымы  иги болур?

Бюгюнлюкде жамауатны кёбюсю  керти назы терекчикни алыргъа сюедиле. Аны баш сылтауларындан бири уа -  байрамгъа  энчи къууанч къошханыды. Ариу, дарман  ийиси бютюнда аламатды. Айтыуларына кёре, ол  хауада бактерияланы ёлтюреди эм  нерваланы да тынчайтыргъа болушады.  Алай бирде   аны ийисинден неда ийнеси этге  чанчылса, сабийлени, уллуланы да  аллергиялары къозгъалыргъа боллукъду.  Бютюнда  отоуда кёп заманны турса.   

Керти назыны игисин  сайларгъа тынч тюйюлдю, бирде аны алыргъа ата-анала сабийлери бла  барадыла. Кёпле, эм биринчиден, аны  субайлыгъына, багъасына эс бурадыла.  Кюнле бла отоуда сюелсе, саулукъгъа заран келтирмезми деб а киши сагъыш этмейди,  тийишли къагъытланы да сормайдыла. Андан сора да, ол кёп кюнлени къууандырырча    болургъа керекди. Аллайны ийнелери жап –жашилдиле,  уусанг а, жаулары чыгъып, ариу ийис этедиле.  Бутакълары хыбыл  кесилген жери да  къаралып башлагъан эсе уа, аны  кёп сюелмезлигин билигиз. Белгилисича, назы жанаргъа ёчдю, аны ючюн  чыракъчыкъланы хайырланнганда,  сакълыкъ артыкъ боллукъ тюйюйлдю.

Назы кёп заманны саргъалмай турур ючюн   адамла тюрлю-тюрлю амалланы хайырланадыла. Аладан бири  будуаспиринни бир таблеткасын сууда эритип, анга гитче къашыкъны бурну бла туз, дагъыда  аллай бир  шекер къошуп,  юзмезде  къатышдырып,  терекни   аны  ичине  15-20 сантиметрге  кёмерге керекди. Андан сора да, ол юсюне тер-терк  суу чачдырыла турса  сюеди.   

Жалгъан назы терекчикни  энчиликлеринден бири,  аны   жыл сайын хайырланыргъа жарагъаныды. Бирде аны кезиую он жылдан да атлайды. Тюкенледе  аланы  кёп тюрлюлери барды, бир-бирлерин а кертиледен да айыраллыкъ  тюйюлсе. Ол жашиллей турады,  ийнелери тюшмейдиле, кеси да терк жанмагъан материалладан этиледи.     

Алай  жалгъан назыны да кемчиликлери бардыла.  Сёз ючюн, ол бийик качестволу стандартлагъа кёре этилсе да, аны къурамы тюрлю-тюрлю химияла  къошулгъан  пластикден жарашдырылады. Бир-бирде уа  аны къурамына  адамны саулугъуна заран салгъан затла да киредиле.   Аны юсюнден а кёбюсюнде этикеткасында  жазылмайды.  Ол себепден эм биринчиден  жалгъан назы  бир тюрлю ийис этмезине эс бурургъа  керекди.  Ала туруп  сертификат качествосу бар эсе да   сурагъыз.  Интернет тюкенден алгъан эсегиз а, эм биринчиден коробканы ачып, хар неси  жете эсе  къарагъыз. Жаратмасагъыз, аны жети кюнню ичинде къайтарыргъа боллукъсуз.  

Магометланы Сулейман хазырлагъанды.