Озгъан ыйыкъда Пятигорск шахарда «СтартМашукСКФО» деген форум ётгенди. Анга СКФО-ну 7 регионундан жыл санлары 14-18 жылгъа жетген къызла бла жашла къатышхандыла. Аны бардырыуну баш борчу добровольческий къымылдауну айнытыугъа себеплик этиу болгъанды. Къабарты-Малкъардан ары 6 школчу жолоучу болгъандыла.

Форумну къууанчлы ачылыууна РФ-ни Президентини СКФО-да толу эркинликли келечиси Юрий Чайка да къатышханды. Ол билим бериу платформаны башланыуун белгилеген кнопкагъа округну айырмалы школчулары бла бирге басханды.

- Сизни алда сейир жашау сакълайды. Жашлыкъ аламат кезиудю. Окъугъуз, билим алыгъыз. Жаланда итиниулюк бла айырмалы болур онг барды. Бир бирге болуша, ахшы проектле къурап, аланы жашауда бардыра, ёсерге керекди. Ол бюгюннгю заманны излемиди, - деп чертгенди Юрий Яковлевич.

Жаш тёлю форумгъа сайланнганладан бири уа Жантууланы Исламды. Таулу жаш Псычох элни орта школуну окъуучусуду эм волонтёрлукъ иш бла да тири кюрешеди. Бу жыйылыуда ол миллетни ата-бабаладан келген ашхы тёрелерине къайтыугъа жораланнган темагъа проектин къоруулагъанды.

Жантууланы Исламны оюмуна кёре, быллай тюбешиуле бек керекдиле. Аланы кезиулеринде тюрлю-тюрлю миллетлени бла динлени келечилери бир бирлери бла къаршыракъ танышыр онглары болады.

Форумну уа жыл сайын ётдюрюр мурат барды. Аны къурагъанла билдиргеннге кёре, ала кезиулю жыйылыугъа Россейни Жигитлерин, белгили алимлени эмда жамауат къуллукъчуланы чакъырып, тюбешиуле къураргъа дейдиле.

Суратда (онг жанындан экинчи) Жантууланы Ислам.

Къасымланы Аминат.