Ди республикэм лэжьыгъэ ­IуэхукIэ къэкIуащ УФ-м и Президентым и полномочнэ лIыкIуэу Кавказ Ищхъэрэ федеральнэ округым щыIэ,
Урысейм и ЛIыхъужь Матовников Александр

КъБР-м и Правительствэм и Унэм щекIуэкIа зэIущIэм хэтащ Къэ­бэрдей-Балъкъэрым и Iэтащхьэ КIуэ­кIуэ Юрий, КъБР-м и Пра­вительст­вэм и УнафэщI Мусуков Алий, хабзэхъумэ, шынагъуэншагъэр къызэ­гъэ­пэ­щы­ным пыщIа IэнатIэхэм, министерствэ зэмылIэу­жьыгъуэ­хэм, щIыналъэм щыIэ дин IуэхущIапIэ нэхъыщхьэхэм я унафэщIхэр, нэгъуэщIхэри.

ЗэIущIэр къыщызэIуихым, КIуэ­кIуэ Юрий къызэхуэсахэм яригъэцIыхуащ Матовников Александр икIи абы ехъуэхъуащ пщэрылъ къыщащIа IэнатIэм ехъулIэныгъэхэр къыщихьыну, Кавказ Ищхъэрэм ­хы­хьэ щIыналъэхэм заужьыным хуэунэ­тIауи куэд зэрызэфIигъэкIынур и фIэщ зэрыхъури къыхигъэщащ.

- Ди зэхуэдэ къалэнщ дыщыпсэу къэралми, абы и зы Iыхьэу щыт Кавказ Ищхъэрэми, Къэбэрдей-Балъкъэрми социально-экономикэ я лъэныкъуэкIэ я щытыкIэр зыхуэдэм дыкIэлъыплъыныр, ар егъэфIэ­кIуэным зэпымыууэ яужь диты­- ныр, а Iуэхур къыдэхъулIэн папщIи дызыхуэныкъуэхэр, длэжьыпхъэ-хэр зэхэдгъэкIыныр, дубзыхуныр, - къыхигъэщащ Матовников Александр, къызэхуэсахэм защыхуигъа-зэм. - Ди лэжьыгъэм мыхьэнэшхуэ щиIэщ УФ-м и Президентым и накъыгъэ Указхэм, Федеральнэ Зэ­хуэсым Зэрызыхуигъэзам щыубзыхуахэр гъэзэщIэным.

КъБР-м и премьер-министр Мусуков Алий и къэпсэлъэныгъэм къыщигъэлъэгъуащ мы зэманым ди республикэм и социально-экономикэ щытыкIэр зыхуэдэр, иужьрей лъэхъэнэм лъэпощхьэпо нэхъы­щхьэу я лэжьыгъэм зыщрихьэлIахэр, ахэр къызэнэкIын папщIэ зэфIагъэкIахэр, 2017 - 2018 гъэхэм фе­деральнэ, щIыналъэ бюджетхэм ­къы­хэкIыу къаIэрыхьа ахъшэр зы­тра­гъэкIуэдар, ди щIыналъэм нэхъ зыщиужь унэтIыныгъэхэм туризмэр, мэкъумэш хозяйствэр зэращыщыр, нэгъуэщIхэри.

КIэлъыкIуэу псалъэ иратащ Къэ­бэрдей-Балъкъэр Республикэм и Правительствэм и УнафэщIым и ­къуэдзэ - инфраструктурэмрэ цифровой зыужьыныгъэмкIэ и ми­нистр Бэлэтокъуэ Владимир. Абы къыхигъэща Iуэхугъуэхэм ящыщщ ди республикэм зыгъэпсэхуакIуэу къакIуэхэм я бжыгъэр нэхъыбэ ­хъуныр ди гъуэгухэм я фIагъми, ­дыкъэзыухъуреихь дунейм къы­щыхъу къызэрымыкIуэ щытыкIэхэм я Iэужьхэр нэхъ псынщIэу гъэкIуэ­дыжынми зэрелъытар.

- Къэгъэлъэгъуапхъэщ ятIэпсхэр къыщехынкIэ, псыдзэхэр къыщиункIэ хъуну шынагъуэ здэщыIэ щIы­пIэхэу ди къэралым иIэхэм ди республикэри зэращыщыр. Иужь илъэсхэм, псом хуэмыдэжу, щIымахуэм бгыщхьэхэм уэсыр Iуву къыщос. Ар абыхэм щызэтрехьэ, гъэмахуэм щоткIужри, зыдэлъадэ къуэхэм дэмыхуэжу псышхуэ щызэрогъэхъури, зыIууэ нэпкъхэр гуилъэсыкIыу, ятIэпс хъужауэ шынагъуэу къы­щызэрохьэх, - жиIащ абы.

Бэлэтокъуэм илъэс ипэкIэ Бахъ­сэн и псыхъуащхьэхэм къыщыхъуа гузэвэгъуэр щапхъэу къихьри, къызэрымыкIуэ щытыкIэм и Iэужь­хэр гъэкIуэдыжыным махуэ бжыгъэ фIэкIа зэрытрамыгъэкIуэдами и гугъу ищIащ.

- Абы къыхэкIыуи, Iуащхьэмахуэ лъапэ зыщызыужь турист-рекреацэ комплексыр тафэм къылъэзыгъэIэс 158-нэ федеральнэ гъуэгур бэIу­тIэIуншэрэ къызыхуэтыншэу къызэ­тегъэнэн папщIэ, ахъшэу ихьынур зыхуэдизыр къыщыгъэлъэгъуа программэ убзыхуа нэгъабэ зэхэтлъ­хьауэ щытащ. Абы текIуэдэну къэдбжащ сом мелард 22-м нэблагъэ, - къыпищащ и псалъэм Бэлэтокъуэм.

КъБР-м и Парламентым и Уна­фэщIым и къуэдзэ АфэщIагъуэ ­Михаил хьэщIэр кIэщIу щыгъуазэ ищIащ республикэм и хабзэгъэув ­IэнатIэм и лэжьыгъэр иужьрей илъэсхэм къриубыдэу зыхуэдам, къыщыхалъхьа жэрдэмхэм ящыщу 4-р федеральнэ мыхьэнэ иIэу къызэралъытам, нэгъуэщIхэми.

УФ-м и Президентым и полномочнэ лIыкIуэу Кавказ Ищхъэрэм щыIэ Матовников Александр, япэу къызрихьэлIа зэIущIэм кърикIуахэр щы­зэхилъхьэжым, къыхигъэщащ Къэ­бэрдей-Балъкъэрыр Кавказ Ищхъэ­рэм и курых щIыналъэу зэрыщытыр.

- А лъэныкъуэмкIи туризмэм зиужьынымкIэ нэхъ шынагъуэншэу щыт щIыналъэхэм хабжэу зэры­хуежьамкIи, республикэм нэгъуэщI и ехъулIэныгъэхэми ущымыгуфIы­кIыпIэр иIэкъым. Фи щIыналъэм теухуауэ федеральнэ центрым иIа Iуэху еплъыкIэми зихъуэжу щIи­дзащ, ди гуапэ зэрыхъунщи. Ар мыбдежым къыщыхэзгъэщмэ нэхъыфIу къэслъытащи, вжызоIэ, - къыпищащ и псалъэм Матовников Александр. - ЕтIуанэрауэ. Мэкъу­мэш ­хозяйствэм, псом хуэмыдэжу хадэ гъэкIыным, зэрызыщиужьымкIэ Къэ­бэрдей-Балъкъэрыр УФ-м и щIыналъэ нэхъ пажэхэм ящыщщ. Ещанэрауэ. Лъэпкъхэм, дин зэхуэ­мыдэ зезыхьэхэм я зэхущытыкIэ­- хэр егъэфIэкIуэнымкIэ республикэр щапхъэфI къэзыгъэлъагъуэхэм хабжэ.

КъБР-м и Iэтащхьэ КIуэкIуэ Юрий Матовников Александр фIыщIэ хуи­щIащ ди щIыналъэм хужиIа псалъэ гуапэхэм щхьэкIэ.

- Дэ дызэреплъымкIэ, дызэдэIэпыкъумэщ, зым и закъуэ къарукIэ ­хулъэмыкIым адрейр щыгъуазэ ищIмэщ ди зэхуэдэ Iуэхур - къэралым, Кавказ Ищхъэрэм, ди республикэм я цIыхухэм я псэукIэр нэхъри егъэфIэкIуэныр къыщыдэхъулIэнур, - жиIащ КIуэкIуэ Юрий зэхыхьэм и кIэухым.

УФ-м и Президентым и полномочнэ лIыкIуэу Кавказ Ищхъэрэм щыIэ Матовников Александр а махуэм яIущIащ Къэбэрдей-Балъкъэрым и дин IуэхущIапIэ нэхъыщхьэхэм я унафэщIхэм, Налшык къалэ дэт мэжджытышхуэр, члисэщIэр, «ДыгъафIэ къалэ» сабий-ныбжьыщIэ гъэсапIэр къиплъыхьащ.