Соруу-жууап

Предпринимательлеге тыш къыралладан партнёрлары бла тюбеширге себеплик этген «Мени экспортум» платформада (https://национальныепроекты.рф/projects/eksport) «Бизнес-миссияла бардырыу» деген сервис ишлеп башлагъанды. Бу сервис презентация материалла жарашдырыргъа, ушакъ бардырыргъа, логистиканы къураргъа, ишчи жумушлагъа керекли жерлени ортакъгъа алыргъа себеплик этерикди. Аны хайырланырча, «энчи кабинетге» кирип, юридический жумушланы тамамларыкъ, логистиканы неда маркетингни къолгъа аллыкъ компанияны сайларгъа керек боллукъду. Анда дагъыда тыш къыралладан алыучу неда сатыучу табаргъа, сора дагъыда товарланы сертификациясын этерге онг барды.

Жумушланы асламысы «бир терезе» деген амал бла бериледиле. Аланы тамамлау бла экспортха себеплик этген регион арала кюрешедиле. Аланы тизмесин https://myexport.exportcenter.ru/contacts сайтда табарыкъсыз. Сервисни жетишимли хайырланнган компанияланы юслеринден а ма бу сайтда окъургъа боллукъду: https://национальныепроекты.рф/news/biznes-missiya-vypolnima-vyyti-na-vneshniy-rynok-pomogaet-tsifrovaya-platforma.

Кеслери иш къурагъанлагъа «больничный» къалай тергелликди?

Аны сагъышын этип, РФ-ни Урунуу министерствосу, кеслери иш къурап къармашханланы, болжал халда ишсиз тургъанланыча алай кёрюрге боллугъун белгилегенди. Шёндю уа аллай программалагъа жаланда энчи предпринимательле, адвокатла, нотариусла эм башхала къатышыргъа эркиндиле.

Ахча ма быллай шартла болгъанда неда кезиуледе берилирге боллукъду: адам ауругъанда, жаралы болгъанда, протез салгъанда, карантиннге кетгенде, ЭКО процедура этгенде, юйюрде саусузуна къарагъанда, санаторийде багъыуда болгъанда.

Министерствону башламчылыгъы келир жыл биринчи июльда кюч алыргъа керекди. Кеслери алларына иш къурагъанлагъа «больничныйни» ёлчеми аланы страховой стажларына эмда тёлеулерин неллай бир заман берип тургъанларына кёре тергелликди.

Стажларыны юсюнден айтханда, ол сегиз неда андан кёп жыл болса – страховой тёлеу толусунлай берилликди. Стажлары 5-8 жыл болгъанлагъа аны ёлчеми – 80, беш жылгъа жетмегенлеге уа – 60 процент боллукъду.

Банк карточканы тас этген эсегиз

Аллай карточканы олсагъат окъуна жабаргъа тийишлиди. Алай этерча талай амал барды.

Биринчиден, банкга сёлеширге керекди. Аны телефон номерин интернет-сайтында табарыкъсыз.

Экинчи амал – мобильный приложенияны хайырланыу. Ол бек терк амалды. Алай анга интернет керекди эмда смартфонда банкны приложениясы болуру да.

Энтта да бир амал - интернет-банкга кирип, «Энчи кабинетде» «Заблокировать карту» деген кнопканы басаргъа. Ызы бла банкдан СМС-код келликди да, аны ары жазаргъа керек боллукъду.

Дагъыда бир амал барды – тюзюнлей банкны офисине барыргъа. Анда уа сизден паспортугъузну излерикдиле. Картаны жапхандан сора жангысын ачарча заявка беригиз. Ол тас болгъан картада ахчаны уа жангысына кёчюрлюкдюле.

Улбашланы Мурат хазырлагъанды.