Кёп болмай РФ-ни Экономиканы айнытыу министерствосу бла ТАСС-информагентство «Цифралы ёмюрдеги журналистика» деген мастер-класс къурагъандыла. Ол «Минводы Экспо»  халкъла аралы   кёрмюч  комплексде  эки кюнню баргъанды. Анга Шимал-Кавказ федерал округну юсюнден жазгъан эм аны субъектлерини  пресс-службаларыны келечилери къатышхандыла. 
Мастер-классны уллу сынамлары болгъан журналистле, Москвадан экспертле  да бардыргъандыла.  Ала арт жыллада  журналистге къаллай проблемалагъа тюберге тюшгенин, ишлеринде не амалланы хайырланнганларын, жангылыкъланы къалай жыяргъа боллугъун,  цифралы медиала  бла ишлеуню онгларын,   рынокда,  законодательствода не   тюрлениуле болгъанларын ангылатхандыла эм кёп башха  магъаналы  темаланы  кётюргендиле. 
Журналистле да, сахнагъа чыгъып, кеслерин танытдырып, нек келгенлерин къысха билдирирге керек болгъандыла. Кёпле  ишлеген жерлеринде айнырча онгла болмагъанларын, быллай жыйылыула уа билимлерин эм сынамларын кючлерге болушурукъларын белгилегендиле.  
Биринчи кюн ТАСС – информация агентствону таматасыны  цифралы айнытыу жаны бла орунбасары Маргарита Головина бюгюнлюкде аслам информация бёлюмде иш къалай къуралгъаныны, окъуучуланы къалай сейирсиндирирге боллугъуну, социал сетьлени хайырланыуну юсюнден да билдиргенди. Ызы бла «ВЕРА» радиону Digital-директору Анастасия Лобада журналист окъуучуланы эслерин кесине къалай бурургъа боллугъун ангылатханды. Рекламала бла кюрешген  Adindex   компанияны  таматасы Татьяна Эшназарова уа  реклама бла байламлы рынокну къыйматлы проектле бла жалчытыуну неден башларгъа кереклисин билдиргенди.    
Экинчи кюн  рынокда брендлени сатаргъа болушхан Andel Relations Group  биригиуню таматасы , венчурный предприниматель, предпринимательстволукъдан курсланы бардыргъан эм бизнес-модель къураргъа болушхан Алексей Карлов сёлешгенди. Ол  арт заманда медиа сферада хайырланыучула нени бегирек жаратханларын, къаллай амалланы хайырланыргъа жарагъанын эм башха затланы юслеринден толу билдиргенди.  
Ызы бла аслам информация, реклама, Интернет  жаны бла юрисконсультла  Кузнецова Варвара бла Анна Лаптиакру журналистика бла байламлы законланы, ол санда ётюрюклени, санкцияланы, эркинликсиз ишлеген организацияланы, тыш къыраллы агентлени эм башха шартланы юслеринден айтхандыла. Жууапха тартылмазча жазаргъа, суратха тюшюрюрге да юйретгендиле.  «Комсомольская правда» радиону редакторуну орунбасары Дмитрий Белецкий а тынгылаучуланы сейирлерин къозгъарча къаллай темала кётюрюлселе иги боллугъун айтханды. Ахырында «Интериум» компанияны коммерциялы директору Андрей Ермошкин  Телеграмм-каналланы юслеринден хапарлагъанды. 
 Ингирде уа  мастер- классха  къатышханлагъа сертификатла берилгендиле. 
Ахырында  бир-бир коллегаларыбызны  оюмларын билирге да  онг табылгъанды. Сёз ючюн, Дагъыстанны  башчысыны пресс-службасыны  келечиси Амина Омарова мастер-классха бюсюрегенин, мында бюгюннгю журналистге  керек темала сюзюлгенлерин   айтханды. Аны бла бирге бирси регионладан коллегалары бла иги танышыргъа, сынауларын сураргъа заман къалмагъанына уа бек жарсыгъанды. 
Андан сора да, Шимал Осетияны башчысыны пресс-службасыны  баш консультанты Габисова Тамара  да быллай башламчылыкъны магъаналылыгъын белгилегенди эм кёп жангы зат билирге онг табылгъанын да чертгенди. 
Саулай алып айтханда, кёпле солургъа, бирсиле бла игирек танышыргъа заманлары къалмагъанына жарсыгъандыла. Болсада келир жыл мастер-класс юч эм андан да аслам кюн барырына, Пятигорскну ариулугъуна къараргъа да онг табыллыгъына ышаннганларын къошхандыла.  
 
 
Магометланы Сулейман.