КъМР-ни Правительствосуну кезиулю кенгешинде аслам бегимни проектлери сюзюлгендиле. Бирлери ведомстволаны ишлерин тийишдириу, алгъыннгы оноуланы тюрлендириу, сора дагъыда ЖКХ, арада байламлыкъла къурау эм башха жумушла бла байламлы эдиле. Къолайсызлагъа эмда къыйын жашау болумлагъа тюшгенлени онгдуруу да арт кезиуледе тёреге айланнганды – аны бла байламлы эки бегим къабыл этилгенди. Жыйылыуну Правительствону Председатели Мусукланы Алий бардыргъанды.

Жер эмда ырысхы бла байламлы халланы министри Аслан Тохов «Къабарты-Малкъарны къырал иелигинден кетерилирге эркин этилмеген объектлени тизмесини» юсюнден законнга тюрлениуле кийирирге оноу этилгенин билдиргенди. Айтханына кёре, ары 92 объект кирликди. Ала асламысында саулукъ сакълау, урунуу эмда билим бериу бёлюмледе объектледиле.

Республиканы Правительствосу «Россети Шимал Кавказ» акционер общество бла келишим этерикди. Экономиканы айнытыу министр Рахайланы Борис билдиргеннге кёре, ол кеси да регионда инвестициялы стандартны сингдириу бла байламлыды. «Ол РФ-ни субъектлеринде жангы инвестициялы проектлеге себеплик этиу системады. Келишимни чеклеринде бизде бардырылгъан аллай проектлени тийишдирирге, аланы юслери бла не зат этилгенин билирге умут барды. Сёз мында электрокюч сетьлеге къошууну юсюнден барады. Кючлери 35 киловольт эмда андан кёп болгъан ток бла жалчытхан объектле къалайлада орналгъанлары эмда алада неллай бир эркин кюч болгъаны власть органланы сайтларында кёргюзтюллюкдю», – дегенди министр.

Борис Магомедович дагъыда республиканы бюджетинден берилген ахчагъа бардырылгъан инвестициялы проектлеге багъа бериу къалай этиллиги тохташдырылгъанын билдиргенди. Сёз мында къоруулау эмда ахча салыргъа кёллендириу келишим этиллик проектлени юслеринден барады. Бу иш эки жыл мындан алгъа башланнганды, аны бла байламлы талай норматив документле да къабыл этилгендиле.

Жашау журт-коммунал мюлкге, промышленность эм башха организациялагъа КъМР-де 2019-2023 жылланы чеклеринде газ тартыу программагъа тюрлениуле кийирилгендиле. Промышленность, энергетика эмда сатыу-алыу министр Шамиль Ахубеков айтханнга кёре, анда бу жаны бла этиллик ишлени план-графиги эмда алагъа неллай бир ахча къоратыллыгъы кёргюзтюледи.

Республикада жолланы 85 процентин 2027 жылгъа битеу белгиленнген излемлеге келиширча этерге керекди. Транспорт эмда жол мюлк министр Аслан Дышеков билдиргенича, быйыл а бу кёрюмдю 72 процентге жетгенди. Дагъыда 2024 жылны ахырына, регион эмда муниципал жолланы экиден бирин ол халгъа жетдирирге тийишлиди. Бу жаны бла уа республика иги къармашханды – бюгюнлюкге ол кёрюмдю 61,7 процентге жетгенди. Уллу шахарлада жолланы да ол кезиуге 85 процентин тап этерге борч салынады. Бу кюнлеге республика аны 81 процентге жетдиргенди.

Министр дагъыда «Шимал Кавказны шахар къатларында пассажир компаниясы» акционер общество бла келишим этилгенин билдиргенди. Сёз мында адамланы Минеральные-Воды – Беслан маршрутда жюрюген поезд бла келир жылда ташыуну юсюнден барады.

Республикада компьютер программаланы жарашдырыугъа келир жыл субсидияла бла себеплик этиллигин цифралы айнытыу министр Ислам Ашхотов билдиргенди. Ол айтханнга кёре, анга регионну бюджетинден 1,5 миллион сом бёлюрге оноу этилгенди.

Билим бериу учреждениялада класслада жумушлагъа къарагъан педагоглагъа ай сайын къошакъ тёлеулеге деп, муниципалитетлеге 14,6 миллион сом юлешинирикди. Жарыкъландырыу эм илму министрни къуллугъун толтургъан Борукаев Анзор айтханнга кёре, ахча федерал бюджетден жиберилгенди.

Анзор Заудинович дагъыда билим бериу къырал эмда муниципал учреждениялада сабийлеге къаралгъаны ючюн берилген тёлеу келир жылда алты процентге кёбейиригин туура этгенди. Окъутуу учреждениялада ишчилеге ай сайын къошакъ халда бериллик ючюшер минг сомну тёлерча бюджетден 90,7 миллион сом жиберирге кереклисин да айтханды. Бу айны биринчисинден башлап, аллай тёлеуню 11,6 минг чакълы адам аллыкъды.

Правительствону резерв фондундан быйылны ахырына дери 60 миллион сом бёлюрге кереклисин урунуу эмда социал къоруулау министр Асанланы Алим билдиргенди. Айтханына кёре, анга жарым мобилизациягъа чакъырылгъанлагъа ай сайын 25 минг сом тёленирикди, ёлген аскерчилени юйюрлерине – бирер миллион сом, женгил жаралы болгъанлагъа  – 100, ауур жаралы болгъанлагъа уа 300 минг сом берилликди.

Кенгешде талай башха бегимлени проектлерине да къаралгъанды. Ол санда Херсондан эмда ол областьдан къачып келип, мында орналыргъа сюйгенлеге жашау журтла сатып алыргъа себеплик этиуню юсюнден да айтылгъанды. ФНС-ни регионда Управлениясыны башчысыны орунбасары Наталья Лытнёва уа жангы жылда налог сферада боллукъ тюрлениулени туура этгенди. Айтханына кёре, ала декларацияла бериуню, арада тергеулени да женгил этерикдиле, ишде халатла уа бек аз боллукъдула.

Улбашланы Мурат.