ЛIыхъужьыгъэм и дерсхэр

КъытщIэхъуэ щIэблэр хэкупсэу, пщIэрэ нэмысрэ яхэлъу гъэсэным дапщэщи гулъытэшхуэ щегъуэт ди щIыналъэм. Школхэмрэ сабий садхэмрэ екIуалIэ ныбжьыщIэхэр щIапIыкI хэкум и лIыхъужьхэм, гуащIэдэкI лэжьыгъэм, зауэм, нэгъуэщI IэнатIэхэм къыщыхэжаныкIахэм я гъащIэ щапхъэм. Ар зи мурад нэхъыщхьэ зэIущIэхэм хуэдэщ Налшык дэт «ДыгъафIэ къалэм» иджыблагъэ къыщызэрагъэпэща Iуэхугъуэр. 
«ЛIыхъужьыгъэм и дерс» фIэщыгъэр зиIа а зэ­хуэсыр къызэригъэпэщащ икIи ири­гъэкIуэкIащ «Урысейм и гугъапIэ» Бзылъхугъэхэм я урысейпсо зэгухьэныгъэм ди республикэм щиIэ IэнатIэм и Налшык къудамэм и пашэ Букинэ Еленэ. Абы кърихьэлIат ТворчествэмкIэ сабий академием и егъэджакIуэхэр, гъэсэнхэр. Букинэм къы­зэ­хуэсахэм яж­риIэжащ и къуэ Анатолэ, бзаджащIэхэм япэ­щIэту зи псэр зытауэ щыта лIыхъужьым, бгъэ­дэлъа гъэсэныгъэмрэ дуней еплъыкIэмрэ. 
Букин Анатолэ 1976 гъэм и щэкIуэгъуэ мазэм къалъ­хуащ. Налшык дэт курыт школ №1-р ехъулIэныгъэкIэ къиу­хащ, 1994 гъэм къы­щы­щIэдзауэ хабзэхъумэ IэнатIэм хэту лэжьащ, щытхъу иIэу, къалэн къыщащI сыт хуэдэ лэжьыгъэри къы­зыхуэтыншэу, жэуаплыныгъэ ткIий зыхищIэу игъэзащIэу. 
Анатолэ и анэ Букинэ Еленэ ныбжьыщIэхэм зэраж­риIэжамкIэ, къуэм гъэсэныгъэ тэмэм иритыфат абы. Анатолэ хэкупсэт, цIыхухэр, ныбжьэгъухэр фIыуэ илъагъурт. Школым щыщIэса илъэсхэми сыт хуэдэ Iуэху и пщэ къыдалъхьэми, ар тэ­мэму зэригъэзэщIыным хущIэкъурт. Хабзэхъумэ IэнатIэм зэрыпэрыта зэманми зэи къэхъуакъым ар ита ТхьэрыIуэм щепцIыжа. Лэ­жьыгъэм щызыIэригъэхьа ехъулIэныгъэхэм папщIэ Букиным къыхуагъэфэщауэ щытащ къэрал дамыгъэ ­лъапIэхэр. Апхуэдэхэт «Кавказым къулыкъу зэрыщрихьэкIам папщIэ», «Зауэм зэрыхэтам папщIэ», «Урысейм и МВД-р илъэс 200 ирокъу», «Къулыкъум къызэрыхэжаныкIам папщIэ» медалхэр, нэгъуэщI­хэри. 
УФ-м и МВД-м Налшык щиIэ полицэ къудамэ №1-м и оперативнэ плъыр нэхъыжь, полицэм и подполковник Букин Анатолэ щапхъэу ягъэлъагъуэу ирихьэкIащ зыпэрыт IэнатIэр. 2013 гъэм къалащхьэм щаукIауэ щытащ, IэщэкIэ зэ­щIэузэда бзаджащIэ къытеуэри. Зи къалэнхэр пэжу, жэуаплыныгъэ пылъу езы­хьэкIа, къулыкъум щы­пэрытым къигъэлъэгъуа хахуагъэмрэ хэлъа лIыгъэмрэ папщIэ Букин Анатолэ ЛIыхъужьыгъэм и орден хуа­гъэфэщауэ щытащ, УФ-м и Президентым къыдигъэкIа Унафэм ипкъ иткIэ. Офицер лIыхъужьым и фэеплъыр ягъэлъапIэу, ар щеджа курыт школым илъэс зыбжанэ ипэкIэ къыщызэрагъэ­пэщащ плIанэпэ щхьэхуэ, Анатолэ и сурэтрэ абы теухуа тхыгъэрэ щызэхуэхьэсауэ. 
«ЛIыхъужьыгъэм и дерсым» кърихьэлIа псори а Iуэхугъуэхэм щыгъуазэ хуищIащ Букинэ Еленэ. НыбжьыщIэхэр щэхуу, Iэдэбу едэIуащ и къуэ лIы­хъужьым теухуауэ анэм къиIуэтэжа хъыбархэм. Урысейм и офи­цер хахуэхэм халъытэ Букин Анатолэ и гъащIэр щапхъэ яхуэхъуащ зэIущIэм хэтахэм. ЕкIуэ­кIыр зыфIэхьэ­лэмэт ныбжьы­щIэхэм уп­щIэхэр я куэдт. Абыхэм ­жэуап яритащ Еленэ. 
Дерсым и кIэухыу Еленэ псоми ехъуэхъуащ узыншагъэ быдэ яIэну, еджэным ехъулIэныгъэфIхэр щызы­Iэрагъэхьэну, мамырыгъэрэ зэпэщыныгъэрэ ди щIыналъэм илъыну. Сабийхэми псалъэ гуапэ хужаIащ офицер лIыхъужьым и гъащIэм гъунэгъуу щызыгъэгъуэза хьэщIэм. Ахэр лъэIуащ Букинэр дяпэкIи къахуеблэгъэну, зэгъусэу зытепсэ­лъыхьын Iуэхугъуэ куэд иджыри зэрыщыIэр къыхагъэщу. 
 КЪАРДЭН Маритэ. 

Поделиться:

ЧИТАТЬ ТАКЖЕ:

28.03.2024 - 09:03

АДЫГЭХЭМ Я КЪЕЖЬАПIЭР

   ЩIыгум и ныбжьым ебгъапщэмэ, псэ зыIут дунейм еплъытмэ, цIыхум къикIуа гъуэгуанэр кIэщI дыдэщ, тхыдэм и щапхъэхэмкIэ ар мащIэщ.

28.03.2024 - 09:03

КАСПИЙСК ЩЫЗОХЬЭЗОХУЭ

Кавказ Ищхъэрэм и щIыналъэхэм алыдж-урым бэнэкIэмкIэ я спортсмен нэхъ лъэщхэр, илъэс 24-рэ зи ныбжьхэр, иджыблагъэ щызэхуэсащ Дагъыстэным и Каспийск къалэм.

27.03.2024 - 13:58

БИЙМ ЗЫ ГУПУ ПЭЩIИГЪЭУВАТ

Тхыдэдж-щIэныгъэлI Сокъур Валерэ «Кърым зауэр къэзыхьа ХьэтIохъущокъуэ и къуэ Кургъуокъуэ - пщыхэм я Iумахуэт» зыфIища и тхыгъэм къызэрыхэщу, зи ныбжьыр илъэс 27-рэ фIэкIа мыхъуа Къаплъэн-Джэрий, I

27.03.2024 - 12:25

ДУНЕЙПСО ЗЭХЬЭЗЭХУЭР Я ПЛЪАПIЭУ

Мэзкуу областым и Рузэ къалэм иджыблагъэ щекIуэкIащ Олимп джэгухэм хыхьэ тхэквондо лIэужьыгъуэмкIэ (ВТФ) Урысейм пашэныгъэр къыщыхьыным хуэунэтIауэ ныбжьыщIэхэм, хъыджэбзхэмрэ щIалэхэмрэ я зэхьэзэх

27.03.2024 - 09:03

СИ ЖЭНЭТ

(ГъащIэ теплъэгъуэ)