Ноябрьни хар ючюнчю ыйых кюнюнде битеу дунияда да авариялада жоюлгъанланы эсгериуню кюнюча белгиленеди. Ол кюн битеу дунияда да жол-транспорт болумлада ачыгъанланы эсгередиле, жорукъланы сакъларгъа чакъырыула этиледиле.

Нальчикде уа аллай эсгериу жумушлагъа авариялада жоюлгъан сабийлени биргелерине окъугъанла, устазла да къатышхандыла.   Нальчикни 12-чи, 28-чи, 33-чю школларыны окъуучулары бла устазлары эмда къырал автоинспекторла аварияла болгъан жерлеге келгендиле. Сабийле плакатлада жол болумда ауушхан нёгерлерини юслеринден эсгериулерин жазгъандыла, ала къаллай жарыкъ болгъанларыны, жашауларында уллу муратла салгъанларыны юслеринден да айтхандыла. Ала ата-аналадан, водительледен сакъ болургъа, сабийлени жашауларын сакъларгъа, билим бериу учрежденияны къатында баргъанда, акъыртын болургъа чакъыргъандыла.

- Аварияланы асламы водительлени низамсызлыкъларыны, жорукълагъа бойсунмагъанларыны, машиналары кемчиликле бла ишлегенлерини хатасындан боладыла, - деп белгилегенди Нальчикни администрациясында билим бериу управлениясыны башчысыны къуллугъун толтургъан Алим Мальбахов.

Бирле кеслерини сынауларына асыры бек базыннганлары, жолда болумну тюрленнгенине эс бурмай, машинаны жюрютген низамны алышмагъанларыны хатасындан боладыла аварияла, деп ангылатхандыла автоинспекторла.

Ахырында сабийле дунияларын замансыз алышхан нёгерлерини хурметине кёкге акъ шарла ашыргъандыла.

Тикаланы Фатима хазырлагъанды.