Авиамодельнэ спортым и тхыдэр ди республикэм етIощIанэ лIэщIыгъуэм икухэм къыщыщожьэ. ЩIалэ цIыкIу куэдыкIейм зыщагъэсащ техник ныбжьыщIэхэм я станцэмрэ пионерхэм я уардэунэмрэ. Абыхэм щызрагъэгъуэта щIэныгъэхэр куэдым сэбэп яхуэхъуащ IэщIагъэ къыхахынымкIэ е къызэрыкIуэ гъащIэм къыщагъэсэбэпащ.
21-нэ лIэщIыгъуэм къыщыщIэдзауэ ди республикэр хъуащ Урысейпсо, адэкIэ дунейпсо зэхьэзэхуэхэр щрагъэкIуэкI щIыналъэ нэхъыщхьэ. Илъэс куэдкIэ зэтраублауэ зэпеуэхэр зэрырагъэкIуэкIым ди республикэр хуэIэижь зэрыхъуам спортсмен лъэщ куэд къришалIэрт, абыхэм ядэплъейурэ ди авиамоделист ныбжьыщIэхэми щIэныгъэм хагъахъуэрт. ЦIыху щэджащэ куэдым хэлъхьэныгъэ хуащIащ а спорт гъэщIэгъуэным и зыужьыныгъэмрэ зэфIэувэныгъэмрэ.
Ди тхыгъэм дыщытепсэлъыхьынущ КъБР-м Авиамодельнэ спортымкIэ федерацэм и унафэщI Нало Юрий зи гугъу къытхуищIыжа, унэтIыныгъэр ефIэкIуэным хэлъхьэныгъэ куу хуэзыщIахэм ящыщ цIыхум.
Авиамодельнэ спортым ди республикэм имызакъуэу къэралым зыужьыныгъэ щигъуэтыным хэлъхьэныгъэ хуэзыщIахэм ящыщщ Къанокъуэ Антемыркъан. Сыт и лъэныкъуэкIи зэчиифIэ а цIыхур зыпэрыхьэ Iуэхур иригъэфIакIуэ зэпытт. Ауэ абы и гъащIэм и лъэныкъуэ гъэщIэгъуэным куэд щыгъуазэкъым. Антемыркъан щыщIалэщIэм Нарткъалэ дэт, техник ныбжьыщIэхэм я станцым и кружокым кIуэуэ щытащ. Зэман кIэщIым къриубыдэу спортым ехъулIэныгъэ щызыIэригъэхьащ, СССР-м спортымкIэ и мастер хъури. Республикэ, щIыналъэхэм зэдай зэхьэзэхуэ куэдым зыкъыщигъэлъагъуэурэ увыпIэ лъагэ куэд къыщихьащ. БалъигъыпIэ иува нэужь Антемыркъан гъэсакIуэ яхуэхъуащ и ныбжьэгъу нэхъыщIэхэм, КъБР-м и командэ къыхэхам и тренер штабым хагъэхьащ икIи I979 гъэм Кавказ Ищхъэрэм и щIыналъэ зэхьэзэхуэхэм къыщахэжаныкIауэ щытащ. Къанокъуэм зэи IэщIыб ищIакъым авиамодельнэ спортыр, техник ныбжьыщIэхэм я станцым щIэх-щIэхыурэ кIуэрт, чэнджэщ яритырт, щIэгъэкъуэн яхуэхъурт.
Налом зэрыжиIэжымкIэ, авиамоделированием хэлъхьэныгъэ нэхъыбэ хуищIащ Къанокъуэр Аруан муниципальнэ щIыналъэм и Iэтащхьэу щылэжьа лъэхъэнэм. Iэмал къыдигъэкIри, Нарткъалэ дэт авиамодельнэ кардодромыр зэрагъэпэщыжащ. СССР-р къутэжа нэужь а зыращ Кавказ Ищхъэрэм къинэжауэ щыIэр. Аращ Урысейм и ипщэ щIыналъэм корд авиамоделизмэр къыщыщIэрэщIыжыным къежьапIэ хуэхъуар. Спортсмен нэхъ лъэщхэр Къанокъуэм и цIыхугъэу зэрыщытым и фIыгъэкIэ Урысейм авиамодельнэ спортымкIэ и федерацэм щIыналъэхэм зэдай, иужькIэ къэралпсо зэпеуэхэр республикэм щригъэкIуэкI хъуащ. Нарткъалэ дэт кордодромым корд авиамоделхэмкIэ Урысейм и Кубокыр къэхьыным ехьэлIа зэхьэзэхуэхэр 20I4 гъэм къыщыщIэдзауэ щекIуэкIащ. Апхуэдэ щIэгъэкъуэныгъэм и фIыгъэкIэ Урысейм и авиамодельнэ зэгухьэныгъэм игъуэтащ зыгъэсэныгъэхэмрэ зэпеуэхэмрэ щригъэкIуэкIын щIыпIэ. НэгъуэщI IэнатIэ щыпэрыувами Антемыркъан авиамоделизмэр и нэIэ тригъэтащ, зэхьэзэхуэхэм екIуалIэрт, Аруан щIыналъэм имызакъуэу республикэ псом и авиамоделист ныбжьыщIэхэм щIэгъэкъуэн яхуэхъуащ.
Апхуэдэу ди лIыхъужьым щыщIалэщIэм дэзыхьэхыу щытар и гъащIэ псом къыдекIуэкIащ икIи республикэми, къэралми, дуней псоми авиамодельнэ спортым зыужьыныгъэ щигъуэтыным хэлъхьэныгъэ хуищIащ.
«ГъэсакIуэр илъэс хъуауэ къытхэтыжкъым. Ауэ абы и хэлъхьэныгъэм илъэс куэдкIэ КъБР-ми Урысейми я авиамодельнэ спортым и зыужьыныгъэм унэтIыныгъэ иритащ. Жэпуэгъуэм Къанокъуэм и фэеплъу Урысейм и Кубокыр къэхьыным ехьэлIа зэпеуэ модель лIэужьыгъуи 5-мкIэ екIуэкIащ. Абы хэтащ Урысейм и спортсмен нэхъ лъэщхэр, Къэзахъстаным, Армением, Литвам, Болгарием я лIыкIуэхэр. Псори зэхэту саугъэт нэхъыщхьэхэм щIэбэнащ цIыху 200-м щIигъу, спортым щIыхь зиIэ и мастеру 6, спортымкIэ дунейпсо категорие зиIэ мастеру I5, Урысейм спортымкIэ и мастеру 65-рэ. Зэхьэзэхуэхэр щекIуэкIащ Къэхъун къуажэм пэмыжыжьэу щыIэ IэрыщI губгъуэм и кордодромым», - жеIэ Нало Юрий.
Сыт и лIэныкъуэкIи къызыхуэт щымыIэу къызэгъэпэщауэ щыта зэпеуэм Къэбэрдей-Балъкъэрым и спорсменхэм зэфIэкI лъагэхэр къыщагъэлъэгъуащ. НыбжьыщIэхэм я зэхьэзэхуэм дыжьын медалхэр къыщахьащ Джатокъуэ Джамболэтрэ Сатушы Тамерланрэ. Балигъхэм я зэпеуэм ещанэ щыхъуащ Нало Алим. Гуп зэхьэзэхуэм Къэбэрдей-Балъкъэрым и командэ къыхэхам ещанэ увыпIэр щиубыдащ.
Къанокъуэ Антемыркъан авиамодельнэ спортым хуищIа хэлъхьэныгъэр IэнатIэр иджыри илъэс куэдкIэ ипэкIэ зыгъэкIуэтэнщ.
КЪЭХЪУН Бэч.
