Прокуратура ангылатады

Россейде урунуу жаны бла федерал законлагъа тюзетиуле кийирилгендиле, ол санда профессионал ишге налогну низамына да. Тюрлениулени юслеринден бизге КъМР-ни прокуроруну тамата болушлукъчусу Сотталаны Жанна айтады:

- Жанна Таукановна, энчи операция эм аны бла байламлы мобилизация башланнганы бла урунуу законлагъа къаллай тюзетиуле кийирилгендиле?

- Быйыл 7 октябрьде 376-ФЗ номерли закон къабыл кёрюлгенди эмда ол Урунуу кодексни 55-чи баш кесегин тюрлендиргенди. Анга жангы статья къошулгъанды – 351.7-чи.

  Ол ишчини бла мобилизация бла аскерде къуллукъ этерге чакъырылгъан инсанны араларында болумланы тюзетеди. Бу жорукъла контракт бла неда кесини ыразылыгъы бла РФ-ни Сауутланнган кючлерине салыннган борчланы толтурургъа кетген инсанлагъа да бурулупдула.

Алай бла ишчиден келген заявлениягъа кёре аны бла урунуу келишимни кючю болжаллы халда тохтатылады, алай аны ишчи жери эмда битеу урунуу гарантиялары сакъланадыла. Бу кезиу ишчи стажгъа къошулады. Айлыкъ эм башха тёлеуле уа урунуу келишим тохтатылгъан кюнден кеч къалмай толусунлай бериледиле.

- Профессионал файдагъа налогну юсюнден законда тюзетиуле уа не бла байламлыдыла?

- «Профессионал файдагъа налог» энчи налог низамны сынау халда бардырыуну юсюнден» Федерал законну 3-чю эм 5-чи статьялары тюзетилгендиле. Ол жаны бла закон быйыл 28 майда чыгъарылгъанды.  Бу налог низам бла энчи предпринимательча эсепге тургъан, турмагъан инсан да хайырланыргъа эркиндиле. Жаланда аланы файдалары артыкъ уллу тюйюл эсе.

 Аны бла хайырланнганны налогуну ёлчеми   НДФЛ-ден азды. Энчи предпринимательле уа НДС-ни эмда кесини жашауун, саулугъун страховать этгени ючюн тёлеулени этмей къояргъа да боллукъдула.  Бу низамны энтта энчилиги – бир тюрлю отчётла берирге керекмейди, налогну инспекция кеси санайды. Бу женгиллик бла хайырланыр ючюн а «Мени налогум» приложенияны болушлугъу бла налог инспекциягъа сатыу-алыу жумушланы юслеринден шартланы билдирирге керекди.

Андан сора да инсан налог тёлеучюню тизмесине эсепге салыуну неда андан кетериуню юсюнден заявленияны налог органлагъа Госуслуги порталны болушлугъу бла берирге боллугъу да белгиленнгенди. Тилек беш кюнню ичинде тинтиледи. Бу жумуш бла уа  Донецк эм Луганск   республикаланы келечилери да хайырланыргъа боллукълары жазылгъанды.

Закон кючюне августда киргенди.

Тикаланы Фатима хазырлагъанды.