Къабарты-Малкъарда «Сабий туугъан юйюрге финанс болушлукъ» деген регион проект бардырылады. Ол кеси да «Демография» деген миллет проектни чеклеринде тамамланады, деп билдиргендиле республиканы Урунуу эмда социал къоруулау министерствосунда.

Анда айтханларына кёре, бу проект аллай юйюрлени къолайлыкъларын игилендирир хыйсап бла къуралгъанды. Аны тамамлаугъа быйыл 3401,99 миллион сом бёлюнюрюкдю.

Алай бла 20 октябрьге, сабий туугъан неда кеслерине сабий алгъан 10220 юйюрге, айлыкъ тёлеуле бла 1514276,10 минг сом берилгенди. Аны хайырланыу 85,09 процентди.

Ючюнчю эмда андан сора туугъан 10446 сабий ючюн а битеуда 1529038,90 минг сом тёленнгенди. Аны бла программаны бу кесеги 99,9 процентге тамам этилгенди.

Улбашланы Мурат хазырлагъанды.