Къабарты-Малкъарны Жамауат палатасында республиканы муниципал биригиулеринде экстремизмни бла терроризмни профилактикасы къалай бардырылгъаныны, миллетлени араларында ахшы байламлыкъланы къурауну юсюнден айтылгъанды. Жыйылыугъа толтуруучу власть эм муниципал власть органланы, жамауат биригиулени келечилери къатышхандыла.  

Миллетлени ишлери эм жамауат проектле жаны бла министрни орунбасары Гергъокъланы Джамбулат билдиргенича, «Битеуроссей граждан бирчалыкъ эм Къабарты-Малкъарны халкъларыны миллет-маданият жаны бла айнытыу» подпрограмманы эм «Къабарты-Малкъарда жамауат организацияла эм граждан обществону институтлары бла байламлыкъла жюрютюу» къырал программаны чеклеринде граждан биригиулюкню кючлер, миллетле эм динле аралы халланы игилендирир, экстремизмни бла терроризмни профилактикасын бардырыр, жамауатда бир бирге тёзюмлюлюкню ёсдюрюр мурат бла мадарла этиледиле.     

Къырал миллет политиканы бардырырча «республика - муниципал район (шахар) - эл» система жарашдырылгъанды. Районланы бла шахарланы барысында да къырал миллет политиканы тамамлаугъа жууаплылыкъ администрацияланы башчыларыны орунбасарларына салыннганды, бу иш бла кюреширик специалистле, динле эм миллетле аралы байламлыкъла жаны бла чыкъгъан сорууланы тинтген комиссияла да бардыла. Регионда бу жаны бла халны дайым эсепде тутарча, даулашлы кезиулени болдурмазча орган да ишлейди. 

«Россейли миллетни бирлигин кючлеу эм къыралны халкъларын миллет-маданият жаны бла айнытыу», «Къабарты-Малкъарда дин организацияланы ишлерин тирилтиу» жаны бла социал проектлени тамамлагъан онбир жамауат организациягъа республиканы бюджетинден 4428,368 минг сом бёлюннгенди. Билим бериу учрежденияла 20-дан аслам мероприятие къурагъандыла, ол санда «Куначество – 2022», «Дин бла намыс этиу – 2022», «Эльбрус – 2022» эм башхала. Жылны ичинде муниципал къуралыулада башха-башха динлени эм миллетлени келечилерини араларында къаугъала, террорист актла эсленмегендиле, деп билдиргенди Гергъокъланы Джамбулат. 

Бахсан районну администрациясыны башчысыны орунбасары Фатима Оганезова алада, методика эсгертиулеге кёре, хар тёрт айдан информация жыйылгъанын, экспертле бла сёлешиуле бардырылгъанларын айтханды. «Аланы къауумларына миллет жамауат биригиулени, маданият араланы башчылары, власть органланы келечилери, динле эм миллетле аралы халланы тинтген илму ишчиле, таматала, районда намыслары жюрюген инсанла бардыла», - деп чертгенди.

Республикада ара шахарында болумну юсюнден а Нальчикни администрациясыны башчысыны орунбасары Тимур Хуров билдиргенди. 

- Арт жыллада социал сетьле жамауат эм къырал къуралыуда аслам жерни алып башлагъандыла. Нальчикде да аланы жамауат-политика болумгъа къошумчулукълары кёп кереге кючленнгенди. Интернетде миллетле аралы ишлени къозгъаргъа, алагъа башчылыкъ этерге кюрешгенле бардыла. Жамауат биригиулени алчылары бла активистлери бир-бирде терс ангыларгъа болурча, огъурсуз затла айтыргъа боладыла. Аны бла байламлы тынчлыкъны сакъларча «Нальчик шахар округда 2022-2025 жыллада Россей Федерацияны къырал миллет политикасын бардырыу» муниципал программа жарашдырылгъанды, - дегенди ол. 

Кётюрюлген теманы магъаналылыгъын белгилей, палатаны башчысыны орунбасары Людмила Федченко жамауат контрольну кючлеу жаны бла, адамла терроризмни бла экстермизмни ниетлерине алданмазча, миллетле аралы халланы игилендирирча ишни тирилтирге чакъыргъанды. 

Жыйылыугъа къатышханла бюгюнлюкде республикада терроризмни эм башха осал болумланы тыйыуда къырал власть органла бла жамауат организацияла тийишлисича къаты турадыла, деген оюмгъа келгендиле. Ахырында сейирлери болгъан ведомтсволагъа бла органлагъа эсгертиуле жиберилгендиле, деп билдиредиле Жамауат палатаны пресс-службасындан.

Кульчаланы Зульфия.