Автоинспекторла бла экстремал службаны специалистлери Россейни Ич ишле министерствосуну Краснодарда университетини квалификацияны ёсдюрюу Шимал-Кавказ институтуну преподавательлери бла бирге полициячыланы усталыкъларын ёсдюрюр ючюн, энчи дерсле ётдюредиле.  Аны чегинде «В» къауумдагъы тюрсюнлю эм таууш сигналла берген машиналаны жюрютген водительлени сынамларын ёсдюрюча практикум къуралгъанды.

Юйретиулени МВД-ны Нальчикде управлениясыны жолда къоркъуусуз жюрюуню пропагандасын бардырыу жаны бла тамата инспектор Анна Борисова, граждан къорууланыу эм къыйын болумладан сакълау ресурс араны преподавательлери Мадина Аброкова бла Ахайланы Виктория бардыргъандыла. Къырал автоинспекцияны къуллукъчусу республикада аварияла бла байламлы болумну юсюнден айтханды эм жолда жюрюгенле жорукъланы тутарча къаллай мадарла этерге боллугъуну юсюнден видео кёргюзтгенди. Экстренный службаланы специалистлери ДТП-да ачыгъанлагъа биринчи медицицна болушлукъну къалай этгенлерин кёргюзтгендиле эм къыйын болумда не этерге тийишли болгъанын эсгертгендиле.

Лекцияны теория кесегинден сора, жыйылгъанла сынау халда манекенледе жюрек-ёпке реанимация, тюрлю-тюрлю жерледен къан тёгюлгенни тохтатып, башына чып тюшгенде байлаула салып кёргендиле.

Тюбешиуню ахырында, къуллукъчула бир бирлерине ыразылыкъларын билдиргендиле, къуллукъларында эм Ата журтубузну гражданларыны саулукъларын сакълауда  жангы жетишимле тежегендиле. Институтну преподавательлери уа быллай юйрениуле ич ишле органланы келечилерин хайырлы болгъанларын белгилегендиле эм мындан арысында да бирге ишлерге хазырлылыкъларын айтхандыла.

Холамханланы Алина.