Гитче эмда орта предпринимательствону айнытыу жаны бла федерал Корпорация (АО «Корпорация «МСП»), промышленностьха къыралны жанындан себеплик этиуню чеклеринде, продукцияларын сатаргъа энтта да бир жангы амал табаргъа сюйгенлеге эмда товарла алыргъа излегенлеге тийишли онгла береди, дегендиле КъМР-ни Экономиканы айнытыу министерствосунда.

Сёз ючюн, МСП цифралы платформада «Производстволу кооперация эмда сбыт» сервис барды. Ол Россейден эмда тыш къыралладан сатыучуланы бла алыучуланы бир-бирлери бла шагъырей этеди. Бу сервисни хакъ тёлемей хайырланыргъа боллукъду. Ол кеси да талай кесекледен къуралады.

Биринчиси. Уллу компаниялагъа товарларын сатаргъа сюйгенле неда кеслерини производстволарына абериле излегенле «Промышленность предприятияланы реестрин» хайырланыргъа боллукъдула. Ол битеу Россейде МСП сферада къармашханланы ачыкъ базасыды. Шёндю анда 24 мингден артыкъ предприятие барды. Сиз да, гитче неда орта предпринимательство бла кюреше эсегиз, предприятиягъызны ары къошаргъа боллукъсуз. Базагъа киргенлеге сиз не зат бла кюрешгенигизни, къаллай продукция чыгъаргъаныгъызны, ишигизни юсюнден хар нени да жик-жиги бла кёргюзтюрюкдюле.

Экинчиси. Предприниматель уллу компаниялагъа къаллай товарла неда производстволагъа не затла керек болгъанларын билирге сюе эсе, сервисни тийишли https://мсп.рф/services/development/retail_noprod/ бёлюмюне кирсин. Шёндю анда сырьё, промышленность продукция, техника керекле эмда абериле сатып алыргъа излеген сатыу-алыу сетьледен бла уллу производстволу компанияладан беш мингден артыкъ заявка барды. МСП цифралы платформагъа киргенлени барына да ол информация ачыкъ халда кёргюзтюледи. Сервисни хайырындан арада байламлыкъла къурагъанла, келишимле этгенле да бардыла.

Улбашланы Мурат хазырлагъанды.