19 сентября, 2022 - 07:30
«Агъачланы сакълау» федерал проектни баш магъанасы Россейде табийгъатны эм уллу байлыкъларындан бирин – агъачны сакъларгъа эм айнытыргъады. Аны чеклеринде 2024 жылгъа дери къыралда кесилген тереклени орунуна аллай бирин орнатыр мурат этиледи.
«Агъачланы сакълау» федерал эм «Экология» миллет проектлеге кёре быйыл тийишли ишлеге федерал бюджетден 8638,5 минг сом (субвенция) бёлюннгенди. Ахча агъачланы жангыртыу бла байламлы тийишли ишлеге къоратылгъанды.
Алай бла жыл башланнганлы 95,2 гектарда агъач мюлкледе тереклени санын ёсдюрюрча мадар этилгенди. Ол санда 100 гектар жууукъ жерде жаш терекле орнатылгъандыла, 900 чакълы бир агротехника ишле тамамланнгандыла, 4 гектарда битимлени салырча жер хазыр этилгенди, 50 гектарда къошакъ халда терекчикле орнатылгъандыла эм 57 гектарда да игилендириу, тапландырыу жумушла бардырылгъандыла.
Сагъынылгъан кезиуде, агъачланы ёртенден къорууларча жангы техника бла оборудование алынмагъанына да къарамай, хата жетмезча агъашчыла участокларына кёз-къулакъ болгъанлай турадыла. Ол санда аслам эс профилактика ишге да бурулады. Адамла бла тюбешип агъачда от этерге, жууукъда орналгъан мюлклеринде къауданны кюйдюрюрге жарамагъынын да къатлап айтып ангылатадыла.
Курданланы Сулейман.