Экономикада, социал сферада, культурада, билим бериуде, саулукъ сакълауда бет жарыкълы уруннган, жетишимле болдургъан 50-ге жууукъ инсаннга КъМР-ни Парламентини Сыйлы грамотасы эмда спикерни Ыразылыгъы берилгендиле. Анга аталгъан къууанчлы иш Парламентни мекямында бардырылгъанды.
Жыйылгъанланы алгъышлай, законла чыгъарыучу органны башчысы Татьяна Егорова бу кюнледе Къабарты-Малкъар кесини юбилейин белгилегенин айтханды. «Озгъан ёмюр республиканы айныууну заманы болгъанды, экономикада, социал сферада, культурада алгъа уллу атламла этилгендиле. Быллай тюбешиуледе уа халкъларыбызны иш кёллюлюклерин бютюнда ангылайса, тёлюлени жигерликлерине ёхтемленесе, аланы туугъан журтубузну, къыралыбызны саулай да айнытыуда, кючлеуде юлюшлерине багъа бересе»,-дегенди.
Татьяна Борисовна залда алгъын тёлюле салгъан ариу тёрелени андан ары бардыргъанла жыйылгъанларын чертгенди. Белгиленнгенлени арасында уа эл мюлкде, къурулушда, промышленностьда, туризмде, культурада, муниципал эм жамауат къуллукълада ишлегенле бардыла. «Сизни хар биригизни да жашауугъуз энчиди, алай барыбызны да алгъа барыргъа, толу кюч бла ишлерге, сайлагъан усталыкъда жетишимли болдурургъа итиниулюк бирикдиредиле. Хар биригизге да халкъгъа, республикагъа бет жарыкълы къуллукъ этгенигиз ючюн жюрегимден ыразылыгъымы айтама. Быллай иш кёллюлюкню себеплиги бла республиканы къолайлы, жашнагъан регионнга айландыраллыкъбыз», – деп къошханды ол.
Ызы бла саугъалау башланнганды. Алай бла жер-жерли самоуправление органланы айнытыугъа салгъан къыйыны ючюн Лескен районну жер-жерли самоуправление советини таматасы Аскерби Сабанчиев КъМР-ни Парламентини Сыйлы грамотасына тийишли болгъанды. КъМР-ни Парламентини депутаты – «Мобильные телесистемы» акционер обществону республикада бёлюмюню таматасы Залийханланы Элдар а бу бийик саугъа бла связьны айнытыугъа этген къошумчулугъу ючюн белгиленнгенди.
Черек районну ара больницасыны баш врачыны къуллугъун толтургъан Рахайланы Аслан да тийишли болгъанды законла чыгъарыучу органны Сыйлы грамотасына. Къабарты-Малкъар къырал университетни келечилерини къаууму да билим бериуню айнытыугъа салгъан къыйынлары ючюн белгиленнгендиле. Аланы арасында социал-гуманитар институтну этнология, КъМР-ни халкъларыны тарыхы эм журналистика жаны бла кафедрасыны профессору Сабанчиланы Хаджи-Мурат да.
Экономиканы айнытыугъа салгъан къыйынлары ючюн Федерал налог службаны КъМР-де Управлениясыны келечилери белгиленнгендиле, аланы арасында Гелястанланы Зинхара, Улбашланы Владимир эм башхала. Агропромышленный комплексде уруннганланы уллу къаууму саугъаланнганды КъМР-ни Парламентини Сыйлы грамотасы бла. Ол санда Чегем районну ветеринария арасыны Шалушкада бёлюмюню таматасы Малкъондуланы Исса да. «Намыс» предприятияны башысы Къулийланы Маликни уа республиканы халкъларыны культура хазналарын сакълауда къыйыны белгиленнгенди.
КъМР-ни Парламентини башчысыны Ыразылыгъы да берилгенди къууанчлы жыйылыуда. Аны бла тиширыуланы жамауат къымылдауларын айнытыугъа къошумчулукълары ючюн Беппайланы Роза бла Зоя Фокичева белгиленнгендиле. Саугъаланнганланы арасында Нальчикни жер-жерли самоуправление советини депутатларыны къаууму да барды, ол санда Балаланы Алим эм башхала да.
Тюбешиуню ахырында Татьяна Егорова саугъаланнганланы энтта бир кере алгъышлагъанды, алагъа жетишимле, саулукъ тежегенди. Тёреде болуучусуча, саугъалау бирге суратха тюшюу бла бошалгъанды.
Тикаланы Фатима.
