19 сентября, 2022 - 06:35
Къабарты-Малкъар Республиканы Башчысы Казбек Коков КъМР-де право низамны жалчытыу жаны бла болжалсыз ишлеп тургъан координация кенгешни эмда КъМР-ни Экономика эм жамауат къоркъуусузлукъ жаны бла советини бирлешген жыйылыуун бардыргъанды. Анга КъМР-ни Парламентини Председатели Татьяна Егорова, КъМР-ни Правительствосуну Председатели Мусукланы Алий, КъМР-ни Башчысыны Администрациясыны таматасы Мухамед Кодзоков, РФ-ни Президентини СКФО-да толу эркинликли келечисини аппаратында тамата федерал инспектор Тимур Макоев, министерстволаны бла муниципал администрацияланы, право сакълаучу эм надзорлукъ этиу органланы, кюч структураланы оноучулары къатышхандыла.
Жыйылыуда экстремизмни, миллетчиликни, этносепаратизмни профилактикасыны эм алгъадан билиуню, дагъыда аллай болумлагъа къажау турууну Россей Федерацияны миллет къоркъуусузлукъ стратегиясыны бардырылыууну соруулары сюзюлгендиле. Ол жаны бла тамамланнган ишни юсюнден КъМР-ни миллетле эм жамауат проектле жаны бла министри Анзор Курашинов, Черек муниципал районну администрациясыны таматасы Къулбайланы Алан, Бахсан муниципал районну администрациясыны таматасыны орунбасары Фатима Оганезова билдиргендиле. Казбек Коков таматалагъа повестканы бу сорууларына дайым эс бургъанлай турургъа буюргъанды.
Къабарты-Малкъар Республикада информация технологияла жаны бла, мобил байламлыкъланы эм интернет-къолайлыкъланы хайырланып аманлыкъла этиуге къажаулукъда право сакълаучу органланы асламлы информация органла бла байламлыкъда ишлеулери андан ары бардырылады. Тындырылгъан ишни юсюнден кесини докладында КъМР-ни ич ишле министри Василий Павлов айтханды. Республиканы Башчысы кёп зат адамлагъа тюз тийишли хапар билдириуге кёре болгъанын чертгенди, аллай аманлыкълагъа къажау туруу соруулада информация эм ангылатыу ишлени кючлерге буюргъанды.
Андан сора да, жыйылыуну чеклеринде предпринимательлеге билеклик этиу жаны бла миллет проектлени бардырыу, къырал жумушланы тапдырыу системаны андан ары цифралы халгъа кёчюрюу, «122» бир федерал номерни амалларын кенгертиу, пандемияны кезиуюнде консультацияла тапдырыу соруулагъа къаралгъанды. «Исси ызны» инсанланы тюрлю-тюрлю жашау магъаналы сорууларына терк болушлукъ тапдырыу бирлешген службагъа тюрлендирир умутлудула. Ол жаны бла тийишли информацияны билдирип КъМР-ни экономиканы айнытыу министри Рахайланы Борис эм КъМР-ни цифралы айнытыу министри Ислам Ашхотов сёлешгендиле, деп билдиреди республиканы оноучусуну пресс-службасы.