Ди республикэм и еджапIэхэм, гъэсапIэхэм мы зэманым щыпащэ Къэбэрдей-Балъкъэрым къэралыгъуэ зэригъуэтрэ илъэси100 зэрырикъур щагъэлъапIэ Iуэхугъуэхэм. Лъэпкъ мыхьэнэ зиIэ апхуэдэ зэхыхьэ дахэ иджыблагъэ къыщызэрагъэпэщащ Нарткъалэ дэт курыт школ №6-м (унафэщIыр Шыбзыхъуэ Оксанэщ) и нэIэм щIэту лажьэ «Налмэс» сабий гъэсапIэм (унафэщIыр Семэн Iэсиятщ). IуэхущIапIэм и егъэджакIуэхэм, гъэсакIуэхэм, ахэр зыкIэлъыплъ цIыкIухэм нэмыщI, гуфIэгъуэ фестифалым жыджэру хэтащ Аруан щIыналъэм щылажьэ школхэм, сабий садхэм я лIыкIуэхэри.
ГуфIэгъуэ зэхуэсым зыкърагъэхьэлIащ КъБР-м Егъэджэныгъэмрэ щIэныгъэмкIэ и министерствэм лъэпкъ егъэджэныгъэмкIэ и къудамэм и унафэщI Мыз Залинэ, Аруан район администрацэм и Iэтащхьэм и къуэдзэ ЦокIыл Азэмэт, егъэджэныгъэмкIэ щIыналъэ IэнатIэм и унафэщIым и къалэнхэр зыгъэзащIэ Жанэ Заурбэч, нэгъуэщIхэми. А хьэщIэ лъапIэхэр, адыгэ хабзэм къызэригъэувым хуэдэу, екIуу ирагъэблэгъащ бысымхэм. КъахуэкIуахэм я цIыхухъу нэхъыжьым махъсымэбжьэ IэщIагъэуващ, хьэпцIийм къыхэщIыкIа адыгэ щIакхъуэ хъурейрэ балъкъэр хъыршын пщтыррэ щIыгъуу.
ХьэщIэхэми фIыщIэ дыдэ ящIащ къыхуащIа апхуэдэ пщIэ лъагэр икIи сэлам гуапэ нэужьым къызэхуэсахэм ехъуэхъуащ кърахьэжьа Iуэхур махуэ хъуну, фIыгъуэ куэд къахудэкIуэну, щIыналъэм гъэ еджэгъуэщIэм щрагъэкIуэкIыну адрей гъэсэныгъэ лэжьыгъэхэм а фестивалыр псыпэ угъурлы яхуэхъуну. Псалъэ зрата ЦокIыл Азэмэти зэIущIэм кърихьэлIахэм ехъуэхъури, Аруан щIыналъэ администрацэм и Iэтащхьэм и къалэнхэр зыгъэзащIэ Ажий Валерэ фестивалым хэтхэм къахуигъэхьа хъуэхъу тхылъым къахуеджащ. Район унафэщIым абы гуапэу защыхуигъэзащ зэхуэсыр къызэзыгъэпэщахэми ар езыгъэкIуэкIхэми лэжьыгъэ купщIафIэ кърахьэлIэну. Апхуэдэу Ажийр псоми ехъуэхъуащ Къэбэрдей-Балъкъэрым къэралыгъуэ зэригъуэтрэ илъэси 100 зэрырикъуамкIи.
Iуэхур щекIуэкI курыт школ №6-м и кадет классым щеджэхэм гуфIэгъуэ щытыкIэм иту утыкум кърахьащ Урысей Федерацэмрэ Къэбэрдей-Балъкъэрымрэ я ныпхэр, къэралым, республикэм я гимнхэр къеуэу. Фестивалыр апхуэдэу Iэтауэ къызэIуаха нэужь, «Налмэсым» и гъэсэн цIыкIухэм ягъэзэщIащ «Дыгъэм и къафэр». Хъурейуэ къеувэкIауэ дахэу къафэ сабийхэм екIупсу ящыгът республикэм щыпсэу лъэпкъ зэмылIэужьыгъуэхэм я фащэхэр.
АдэкIэ утыкур хуит хуащIащ фестивалым къыхузэрагъэпэща махуэшхуэ концертым хэт ныбжьыщIэхэм. Ахэр къэфащ, джэгуащ, уэрэдхэмрэ усэхэмрэ жаIащ. КъыкIэлъыкIуэу фестивалым кърихьэлIа хьэщIэхэр ирагъэблэгъащ сабий садым и пщIантIэм къыщызэIуаха лъэпкъ пщIантIэ цIыкIухэм. Абыхэм щызэхуэхьэсат ди щIыналъэм щыпсэу лъэпкъхэм пасэ зэманым зэрахьэу щыта хьэпшып гъэщIэгъуэнхэр. Апхуэдэу утыкум ит Iэнэ лъакъуищхэм телът лъэпкъ шхыныгъуэ щIэщыгъуэхэр. Пасэрей пщIантIэхэр къызэгъэпэщыным я зэфIэкI ирахьэлIащ Аруан районым хыхьэ еджапIэхэм, гъэсапIэхэм ящыщ куэдым.
Лъэпкъ фестивалыр джэгу дахэкIэ зэхуащIыжащ. IуэхущIапIэм къыдэкIыж хьэщIэ лъапIэхэр иригушхуэрт абы и егъэджакIуэхэм, гъэсакIуэхэм, ныбжьыщIэхэм ябгъэдэлъ зэчийхэм, щIэныгъэм. Ар гуапэ ящыхъурт зэхэзых псоми: зыхужаIэ лэжьакIуэхэми, абыхэм я гъэсэнхэми, адэ-анэхэми.
КЪАРДЭН Маритэ.