Санкт-Петербургну Законла чыгъарыучу жыйылыууну делегациясы КъМР-ни Парламентини президиумуну келечилери бла тюбешгендиле.
Республиканы законла чыгъарыучу баш органы бла шагъырейлениуню къонакъла экскурсиядан башлагъандыла. Алагъа регионну тарыхыны юсюнден айтылгъанды, делегация КъМР-ни 100-жыллыгъын белгилеу кюнледе келгенине энчи эс бурулгъанды.
Тюбешиуню ача, Парламентни башчысы Татьяна Егорова июньда Санкт-Петербургда законла чыгъарыучу органланы араларында бирге ишлеуню юсюнден келишимге къол салыннганын эсгертгенди. Спикер КъМР-ни Парламентини къуралыууну, законодательный башламчылыкъларыны, башха субъектле бла байламлыкъланы юслеринден да билдиргенди.
– Келишим хайырлы болур ючюн а, аны тамамлауну планын хазырлагъанбыз. Биз жашауда бирге бардырлыкъ жумушла уа асламдыла, сёзге, туризмде. Магъаналы, бирге ишлерге керекли сорууланы сюзербиз деп ышанама, – дегенди ол.
Татьяна Борисовна эки регионну да чыгъармачылыкъ, культура, билим бериу байламлыкълары къаты болгъанларын чертгенди. Ол къонакъла байрам жумушлагъа къатышып, республиканы халкъларыны тёрелери, жетишимлери бла терен шагъырей боллукъларына ышаннганын айтханды.
Санкт-Петербургну Законла чыгъарыучу жыйылыууну башчысы Александр Бельский Къабарты-Малкъар бла келишимни магъаналылыгъына эс бургъанды.
– Бизни регион уллуду, аны себепли эл мюлк продукция аслам керекди. Бу жаны бла байламлыкъла къураргъа тийишлиди. Республика кесини ариулугъу бла сейир этдиргенди. Аны себепли Санкт-Петербургну бла Къабарты-Малкъарны араларында туризм байламлыкъланы къурауну онгларын сюзерге керекди. Шёндюгю заманда ич туризмге баш магъана бериледи. Нальчик къалай айбатланнганын кёребиз – ол таза, ариу шахарды. Къонакъбайлыгъ а жюрегибизде къаллыкъды. Биз керти да бир бирге жууукъбуз: Ата журтубузгъа сюймеклик, Ленинград блокадагъа тюшгенини тарыхына сакълыкъ бирикдиредиле. Аны ючюн халкъларыбызны шуёхлукъларын кючлерге, ёсюп келген тёлюлени анга юйретирге керекди, – дегенди ол.
Александр Бельский Санкт-Петербургну Законла чыгъарыучу жыйылыууну келечилери Къабарты-Малкъаргъа байрам кюнледе келгенлери, къууанчлы жумушлагъа къатышыргъа онглары болгъаны артыкъда къууандыргъанын да айтханды.
КъМР-ни Парламентини пресс-службасы.
