Кёп болмай эрттегили тау элледен бири  Кёнделенде МТС   жангы 4G станцияcы жарашдырылгъанлы связь игилендирилгенди эм  Интернет да эки кереге терк ишлеп башлагъанды.    

Инфраструктураны айный баргъаны, мында жашагъанладан сора да,  Элбрус курортха келген туристлеге да ахшы себеплик боллукъду. Аланы иги кесеги Кёнделенде тохтап солургъа сюедиле, энди уа аллй кезиуде цифралы сервисле бла хайырланыргъам, жумушларын тамамларгъа, нёгерлерине сёлеширге эм суратларын ашырыргъа да  онг табарыкъдыла. Эллиле да бир тюрлю чырмаусуз дистанция халда ишлерге, окъургъа, тюкенледен керек товарла алыргъа  эм башха жумушларын да тамамларгъа боллукъдула. 

Бюгюнлюкде Кёнделен алты минг адам жашагъан уллу, буруннгу журтладан бириди. Ол  бир ненча кере къурала тургъанды, тарыхы да  минг жылла бла тереннге кетеди. Аны тийресинде бизни эрагъа дери эм орта ёмюрледен эсгертмеле къалгъандыла. Археология ишлени кезиуюнде кёп сейир затла да табыладыла.   Ол себепден тышындан  келген къонакъла  анда жашагъан таулуланы  жашауларын,  маданиятларын билирге  сюйгенлери да баямды. 

МТС –ни республикада бёлюмюню таматасы Залийханланы  Элдар айтханыча,  Big Data МТС кёргюзтгеннге кёре, бу жайда  туристлени  саны жыйырма процентге ёсгенди. Элбрусха жайда тауланы, жаяу маршрутланы, кёллени, нарат агъачны сюйгенле келедиле. 

- Къабарты-Малкъарны къайсы бир  жеринде да жерлешлерибизге бла  къонакълагъа тап  болурча   телекоммуникация оборудования  жангыртырча уллу иш бардырабыз. ИТ-инфраструктураны кенг хайырланылгъаны  адамланы жашауларын игилендиреди эм ич туризмни айнытыргъа да болушады,- дейди Залийхан улу.

Магометланы Сулейман.