Къэбэрдей-Балъкъэр Республикэм и илъэси 100 махуэшхуэм ирихьэлIэу екIуэкI Iуэхухэм хэтыну щIыналъэм хьэщIэ куэд къыхуоблагъэ. Абыхэм ящыщщ УФ-м и сенатор, Урысейм и ЛIыхъужь, алыдж-урым бэнэкIэмкIэ щэнейрэ олимп чемпион хъуа Карелин Александр, гандболымкIэ олимп чемпион, Ставрополь щIыналъэм и Думэм Экономикэм зегъэужьынымрэ уней мылъкухэмкIэ и комитетым и унафэщIым и къуэдзэ Лавров Игорь, велоспортымкIэ олимп чемпион, СССР-м спортымкIэ щIыхь зиIэ и мастер Шыхъуэ Борис.
Лъэхъэнэ зэхуэмыдэхэм ехъулIэныгъэшхуэхэр зыIэрызыгъэхьахэр КъБР-м и Парламентым щызэIущIащ, республикэм и хабзэубзыху орган нэхъыщхьэм и УнафэщI Егоровэ Татьянэ зыхуагъэзащ.
- ФIыщIэ фхудощI ди республикэм и махуэшхуэм ирихьэлIэу фыкъытхуеблэгъэну Iэмал къызэрывгъуэтам папщIэ, - яжриIащ Егоровэ Татьянэ хьэщIэхэм.
Ахэр тепсэлъыхьащ Къэбэрдей-Балъкъэрым и спортсменхэм я ехъулIэныгъэхэмрэ республикэм физическэ щэнхабзэмрэ спортымрэ зэрызыщрагъэужь Iуэхухэмрэ.
ИужькIэ хьэщIэхэм къахуэзащ КъБР-м и Парламентым и Президиумым хэтхэр. А зэIущIэм хэ- тащ УФ-м и сенатор - КъБР-м и Парламентым и лIыкIуэу УФ-м и Къэрал Думэм щыIэ Ульбашев Мухьэрбийрэ УФ-м и Къэрал Думэм и депутат Геккиев Зауррэ.
- Иджыпсту ди щIалэгъуалэр хущIокъу гъащIэ узыншэ зэрырахьэкIыным, абы щхьэкIэ спортым жыджэру хохьэ. Дэ ди къалэнщ дэтхэнэми Iэмал нэхъыбэ едгъэгъуэтыну. Спортыр, шэч хэмылъу, лэжьыгъэ гугъущ, къаруушхуэ зэпхьэлIэн хуейщ. Абы къыхэкIыу фIыщIэ фхуэсщIыну сыхуейт ехъулIэныгъэ зыIэрывгъэхьахэм, ди къэралым и пщIэр къызэрыфIэтым папщIэ. Узыншагъэ фиIэну, фэ фхуэдэу гъэсэн лъэщхэр къыфщIэхъуэну си гуапэщ, - жиIащ Егоровэ Татьянэ.
Карелин Александр къыхигъэщащ Къэбэрдей-Балъкъэрым спортым, псом хуэмыдэу бэнэкIэ лIэужьыгъуэхэм, гулъытэ хэха зэрыщыхуащIыр. Абы фIыщIэ хуищIащ КъБР-м и Парламентым и УнафэщIым и къуэдзэ Къардэн Мурат спортым хэтхэм я Iуэхур зэрадиIыгъым папщIэ. Апхуэдэуи ар республикэм щыпсэухэм ехъуэхъуащ щIыналъэм и махуэшхуэмкIэ.
- Иджыпсту мыбдеж сызэрыщыIэм си гур хегъахъуэ. Къыхэзгъэщыну сыхуейщ Къэбэрдей-Балъкъэрым и илъэси 100-р Совет Союзыр къызэрыунэхурэ апхуэдиз дыдэ зэрыхъум зэрытехуэр. Къэбэрдей-Балъкъэрыр лъэпкъ зэмылIэужьыгъуэ куэду зэхэтми, дэтхэнэми мыбдеж Iэмал щиIэщ и хабзэфIхэр, тхыдэмрэ щэнхабзэмрэ щихъумэжыну. КъБР-м и Парламентым и депу- татхэм фIыщIэ фхузощI щIыналъэм зэгурыIуэ илъу, зым адрейр къилъытэу зэрыщызэхущытым щхьэкIэ, - дыщIигъуащ Карелиным.
Шыхъуэ Борис тепсэлъыхьыжащ 1972 гъэм Мюнхен щекIуэкIа гъэмахуэ Олимп джэгухэм зэрызыхуагъэхьэзырауэ щытар, и спорт гъуэгуа-нэм, республикэм велоспортым зэрызыщрагъэужьым.
- Илъэс 50 ипэкIэ, республикэр къызэрыунэху-рэ апхуэдэ бжыгъэ дахэ щрикъум ирихьэлIэу, Олимп джэгухэм дыщэ медалыр къыщысхьауэ зэрыщытар сызыгъэгушхуэщ. Иджы а бжыгъэр илъэси 100 хъуащ. Нобэр къыздэсым уэрамхэм сыкъыщагъэувыIэу ягу къыщагъэкIыж щыIэщ Олимпиадэм къыщытхьа ехъулIэныгъэшхуэм абы щыгъуэм ди республикэр зэрыщыгуфIыкIар.
Лавров Игорь жиIащ мыгувэу парламентхэр зэгъусэу зэдэлэжьэн щIадзэным зэрыщыгугъыр.
- Къэбэрдей-Балъкъэрым хуэдэ щIыналъэ дызэригъунэгъур икъукIэ си гуапэщ. Ауэ, ди жагъуэ зэрыхъунщи, ди парламент зэхуэсхэр апхуэдэу куэдрэ едгъэкIуэкIыркъым. Дыщогугъ дяпэкIэ нэхъ жыджэру дызэдэлэжьэн щIэддзэжыну. Республикэм щыпсэухэм мамырыгъэ яIэну, бэIутIэIуншэу псэуну дохъуэхъу! - жиIащ Лавровым.
ХьэщIэхэм зыщагъэгъуэзащ депутатхэмрэ КъБР-м и Парламентым и Аппаратым и лэжьакIуэхэмрэ я спорт ехъулIэныгъэхэр къыщагъэлъэгъуа выставкэм.
КъБР-м и Парламентым и пресс-IуэхущIапIэ .