Къабарты-Малкъарда «Хорламны диктанты»  60 жерде жазылгъанды. Бу жумуш «Единая Россия» политика партияны «Тарыхны эсде тутуу» проектини чеклеринде  бардырылгъанын эсгертирчады.  

Партияны республикада регион бёлюмюню пресс-службасындан бизге билдиргенлерича, быйыл бу патриот акция тёртюнчю кере къуралгъанды. Аны бардырыугъа «Хорламны волонтёрлары» къымылдау, башха жамауат организацияла да къатышхандыла.

Студентле, власть органланы келечилери да бирге олтуруп, Уллу Ата журт урушну тарыхын къалай билгенлерин сынагъандыла. Аскер махтаулукъну шахары  Нальчикде уа   диктантны Къабарты-Малкъар къырал университетде бла Валерий Коков атлы аграр университетде, Искусстволаны Шимал-Кавказ къырал институтунда эм башха жерледе жазгъандыла. Анга къатышханланы арасында РФ-ни Къырал Думасыны депутатлары Виктория Родина, Геккиланы Заур, КъМР-ни Парламентини башчысы Татьяна Егорова, аны орунбасары Жанатайланы Салим эм башхала бар эдиле.

- Бу акцияны ёсюп келген тёлюню юйретиуде магъанасы артыкъда уллуду. Аны бла бирге уа башха къыралланы инсанлары да ол къанлы къазауатны юсюнден керти хапар биледиле. Диктантны баш магъанасы Уллу Ата журт урушну тарыхына жамауатны эсин бурууду, деменгили къыралыбыз  Хорлам ючюн къаллай багъа бергенин ангылатыуду. Дунияны фашизмден тазалагъан къыралыбызны тарыхы барыбызны да ёхтемлендиреди,-дегенди диктантны юсюнден Виктория Родина.

Геккиланы Заурну айтханына кёре уа, Хорламны болдургъан халкъны жигитлигин ёмюрлюк этерге, тарыхны жангыдан жазаргъа сюйгенлеге къажау турургъа барыбыз да борчлубуз.

- Хорламны келтирген батыр тёлюге баш урургъа, къыралыбызны тарыхына, келир жашаууна да  жууаплы болургъа керекбиз. Диктантха уа битеу дунияда да сейир ёсгенлей барады. Анга быйыл 42 къырал къатышханы уа Уллу Хорламны фашизмни жокъ этиуде магъанасына шагъатлыкъ этеди,-дегенди ол.

Тикаланы Фатима хазырлагъанды.