Къэбэрдей-Балъкъэрым Мэкъумэш хозяйствэмрэ ерыскъыпхъэхэмкIэ и министерствэм хъыбар къызэрыдигъэщIамкIэ, ди республикэм и консерв предприятэхэр (ахэр 9 мэхъури, 6-м нащэр, 3-м помидорыр ирашалIэ) я гуащIэгъуэу хадэхэкIхэм йолэжь.
Мы зэманым нащэ фIэIуу банкI мелуан 50, томат пIастэу банкI мелуан 20, помидор фIэIуу мелуани 10 къыщIагъэкIыну хунэсащ.
ХадэхэкIхэм къадэкIуэу нартыху пасэми йолэжь банкI мелуан 15 ягъэхьэзыращ. Апхуэдэу и кIэм нэсащ джэш щхъуантIэм и къехьэлIэжынымрэ и гъэфIэIунымрэ. Абыхэм елэжь предприяти 7-м банкI мелуан 62-рэ къыщIагъэкIащ икIи ар илъэс кIуам ягъэхьэзырам нэхърэ проценти 105-кIэ нэхъыбэщ.
ДыщыгуфIыкIыпхъэу, Къэбэрдей-Балъкъэрым и консерв предриятэхэр хадэхэкIыу зэлэжьыр езыхэм къагъэкIыжащ, я къабзагъэрэ я IэфIагъкIэ къапэхъун къэгъуэтыгъуейуэ, аращ щIэупщIэшхуи щIаIэр. Нобэ ди фIэIугъэхэр Урысейм и щIыналъэхэм я мызакъуэу, нэгъуэщI къэралхэми щащэху икIи абыхэм я бжыгъэр мелуан 350-м нызэрохьэс. Ахэр ящыщщ хадэхэкIым елэжьу Урысейм ит предприятие нэхъыфIу 5-м, зи хадэхэкIым елэжьыжу УФ-м и Ипщэ щIыналъэм щыIэ предприятэу 3-м.
Къэбэрдей-Балъкъэрым и консерв предприятиехэм апхуэдэ зэфIэкIыфI яIэным къежьапIэ хуэхъуащ иджырей технологиехэмрэ логистикэ тэмэмрэ зэраIэм, щIым зэрелэжь Iэмалхэр дунейпсо мардэхэм тету зэрырагъэфIэкIуам.
Консерв IуэхущIапIэхэм кIуэ пэтми заужь, абы и фIыгъэкIэ цIыху куэдыр лэжьапIэкIэ къызэгъэпэща мэхъу. Къапщтэмэ, хадэхэкIым и Iухыжыгъуэ лъэхъэнэм ягъэлажьэхэм я бжыгъэр мини 10-м нос. Мыбдежым къыхэгъэщыпхъэщ, нэгъуэщI къэралхэм я продукцэхэр дыдейхэмкIэ зэхъуэкIыным ди щIыналъэм и предприятэхэми я зэфIэкI псори зэрырахьэлIэр. 
 

Лъостэн Музэ.